ஆசியக்கோப்பை ஆண்கள் 5 பேர் ஹாக்கி இறுதிப் போட்டியில் பாகிஸ்தானை வீழ்த்தி இந்தியா சாம்பியன் பட்டம் வென்றது. இதன்மூலம், உலக கோப்பை தொடருக்கும் இந்திய அணி தகுதி பெற்றுள்ளது.
5 பேர் ஹாக்கி உலக கோப்பை தொடருக்கு தகுதிச்சுற்றான ஆசிய மண்டல ஆண்கள் தொடர் ஓமன் நாட்டின் சலாலா நகரில் செவ்வாய்க்கிழமை தொடங்கியது. இந்தத் தொடரில் லீக் சுற்று முடிவில் 5 போட்டிகளில் 4 வெற்றி, 1 தோல்வி உடன் அரையிறுதிக்கு முன்னேறிய இந்திய அணி, 10-4 என்ற கோல் கணக்கில் மலேசியாவை வீழ்த்தி இறுதிப்போட்டிக்கு முன்னேறியது. இந்நிலையில், நேற்று(சனிக்கிழமை) நடைபெற்ற ஆசிய ஆண்கள் 5 பேர் ஹாக்கி இறுதிப் போட்டியில் இந்தியா, பாகிஸ்தானுடன் மோதியது. இந்தப் போட்டி 4-4 என்ற கோல் கணக்கில் சமன் ஆன நிலையில் ஷூட் அவுட் முறை கொண்டு வரப்பட்டது. இதில் 6-4 என்ற கோல் கணக்கில் பாகிஸ்தானை வீழ்த்தி இந்தியா வெற்றி பெற்றது. இதன்மூலம் இந்திய அணி அடுத்த ஆண்டு நடைபெறும் முதலாவது 5 பேர் ஹாக்கி உலக கோப்பை தொடருக்கும் தகுதி பெற்றுள்ளது குறிப்பிடத்தக்கது.
