அயோத்தி ராமர் கோவிலுக்கு அர்ச்சகர்களை நியமனம் செய்வதற்காக பயிற்சி பெறுவதற்கு இளைஞர்களுக்கு அழைப்பு விடுக்கப்பட்டுள்ளது. ஆர்வமுள்ள இளைஞர்கள் விண்ணப்பிக்கலாம் என்றும் ஸ்ரீ ராம் ஜென்மபூமி தீர்த்த க்ஷேத்ரா அறக்கட்டளை அறிவித்துள்ளது.
உத்தர பிரதேச மாநிலம் அயோத்தியில் பிரம்மாண்ட ராமர் கோவில் கட்டப்படுகிறது. அடுத்த வருடம் ஜனவரியில் இக்கோவில் திறக்கப்பட உள்ளது. இந்தநிலையில், அர்ச்சகர்களை நியமனம் செய்வதற்கான அறிவிப்பை வெளியிட்டுள்ளது. ஸ்ரீ ராம் ஜென்மபூமி தீர்த்த க்ஷேத்ரா அறக்கட்டளை அதிகாரப்பூர்வ அறிவிப்பில், 20 முதல் 30 வயதுக்குட்பட்ட இளைஞர்களுக்கு அர்ச்சகர்களாக பயிற்சி அளிக்க முடிவு செய்யப்பட்டுள்ளதாகவும் ஆர்வமுள்ளவர்கள் வரும் 31ம் தேதிக்குள் அறக்கட்டளை மின்னஞ்சலில் விண்ணப்பிக்கலாம் என்றும் தெரிவிக்கப்பட்டுள்ளது. குறிப்பாக அயோத்தி பகுதியை சேர்ந்தவர்களுக்கு முன்னுரிமை அளிக்கப்படும் என்று தெரிவிக்கப்பட்டுள்ளது.
படிவத்தில், விண்ணப்பதாரர்கள் தங்கள் பெயர், பிறந்த தேதி, கோத்ரா, குடியிருப்பு மற்றும் நிரந்தர முகவரிகள், குருகுலத்தின் பெயர் மற்றும் ஆச்சார்யாவின் பெயர் ஆகியவற்றைக் கொடுக்க வேண்டும். தேர்வுச் செயல்பாட்டில் நேர்மையை உறுதிப்படுத்த, நுழைவுத் தேர்வுகளை நடத்த அறக்கட்டளை முடிவு செய்துள்ளது. தேர்வில் தேர்ச்சி பெறும் விண்ணப்பதாரர்கள், ஆறு மாத பயிற்சி பெற வேண்டும். அறக்கட்டளையின்படி, பயிற்சி காலத்தில் விண்ணப்பதாரர்களுக்கு மாதம் ரூ.2,000 உதவித்தொகை வழங்கப்படும். அவர்களுக்கு உணவு மற்றும் தங்கும் வசதியும் செய்து தரப்படும்.
அறக்கட்டளை உறுப்பினர் அனில் மிஸ்ரா கூறியதாவது, விண்ணப்பதாரர்கள் குறைந்தபட்சம் ஆறு மாதங்களாவது ராமானந்தி பாரம்பரியத்தில் தீட்சை எடுத்திருக்க வேண்டும் என்றும், குருகுல கல்வி முறையில் படித்திருக்க வேண்டும் என்றும் கூறியுள்ளார். பயிற்சியை வெற்றிகரமாக முடித்த விண்ணப்பதாரர்களுக்கு அறக்கட்டளை சான்றிதழ்களை வழங்கும். சான்றிதழ்கள் வழங்கப்பட்ட விண்ணப்பதாரர்கள் மட்டுமே இறுதித் தேர்விற்கு அனுமதிக்கப்படுவர். கும்பாபிஷேகம் மற்றும் தெய்வம் தொடர்பான அனைத்து மத நிகழ்வுகள் தொடர்பான விவகாரங்களைக் கவனிப்பதற்காக ஸ்ரீ ராம் சேவா விதி விதான் சமிதியை அமைக்கவும் அறக்கட்டளை முடிவு செய்துள்ளது என்றும் அனில் மிஸ்ரா கூறினார்.
அறக்கட்டளையின் பொருளாளர் கோவிந்த் தேவ் கிரி கூறுகையில், ராம் லல்லாவின் தினசரி சடங்குகள் செய்யப்படும் மத உரையை சமிதி தயாரிக்கும். ராமநந்தி சம்பிரதாயம் மிகப்பெரிய இந்துப் பிரிவுகளில் ஒன்றாகும். இந்த பிரிவை பின்பற்றுபவர்கள் ராமரை வணங்குகிறார்கள். அவர்கள் வைஷ்ணவர்கள் மற்றும் 15 ஆம் நூற்றாண்டின் மத மற்றும் சமூக சீர்திருத்தவாதியான ராமானந்தரைப் பின்பற்றுபவர்கள் என்று தேவ் கிரி கூறினார்.
