டெல்லியில் வரும் 9,10 தேதிகளில் நடக்கும் ஜி 20 மாநாட்டில் பங்கேற்கும் பல்வேறு நாடுகளின் தலைவர்களுக்கு குடியரசு தலைவர் விருந்தளிக்கிறார். அதற்காக அவர்களுக்கு அழைப்பிதழ் அனுப்பப்பட்டுள்ளது. அதில் இந்திய குடியரசு தலைவர் என்பதற்கு பதிலாக பாரத் குடியரசு தலைவர் என அச்சிடப்பட்டிருந்தது பெரும் சர்ச்சையை கிளப்பியது. மேலும் பிரதமர் மோடியின் பயணமாக இந்தோனேஷியா பயணம் குறித்து வெளியான நிகழ்ச்சி நிரலில் ”Prime Minister of Bharath” என குறிப்பிடப்பட்டுள்ளது. இந்தியாவிற்கு பாரத் என்று பெயர் மாற்றப்படுவதாக நாடு முழுவது பெரும் விவாதம் எழுந்துள்ளது. இந்த பெயர் மாற்றத்திற்கு பல்வேறு பிரபலங்கள் ஆதரவு மற்றும் எதிர்ப்பை தெரிவித்து வருகின்றனர்.
இந்நிலையில் 1983 உலகக் கோப்பை சாம்பியனும், கிரிக்கெட்டின் புகழ்பெற்ற நபர்களில் ஒருவருமான, சுனில் கவாஸ்கர் இந்த விவகாரம் குறித்து கருத்துக்களை தெரிவித்துள்ளார். “பாரத்” இன்னும் அதிகாரப்பூர்வ பெயராக செயல்படுகிறது என்றும் ஆனால், ஒரு மாற்றம் வர வேண்டும் என்றால், அதை எல்லாவற்றிலும் கொண்டு வர வேண்டும் என்றும் சுனில் கவாஸ்கர் கூறினார்.
மேலும் பேசிய சுனில் கவாஸ்கர், “பாரத் தான் ஒரிஜினல் பெயர். ஆனால் அது அதிகாரப்பூர்வ மட்டத்திலும், அரசாங்க மட்டத்திலும், பிசிசிஐ மட்டத்திலும் செயல்பட்டு அணியை “பாரத் கிரிக்கெட் டீம்” என்று அழைக்க வேண்டும். அதற்கான மாற்றங்கள் ஏற்பட்டுள்ளன. பர்மா இப்போது மியான்மர் என்று அழைக்கப்படுகிறது. அதனால் அசல் பெயர் உள்ளே வரலாம். பாரத் என்ற பெயரால் எனக்கு எந்த பிரச்சனையும் இல்லை. ஆனால், அடிப்படையில், அது எல்லாவற்றிலும் வர வேண்டும்,” என்று அவர் கூறினார்.
முன்னாள் இந்திய கிரிக்கெட் அணியின் துவாக்க ஆட்டக்காரரான வீரேந்திர சேவாக், ஜெர்சியில் இந்தியாவுக்குப் பதிலாக பாரத் இருப்பது தொடர்பான உரையாடலை முதலில் தொடங்கியவர். அவர் தனது ட்விட்டரில், ‘ஒரு பெயர் நமக்கு பெருமை சேர்க்கும் ஒன்றாக இருக்க வேண்டும் என்று நான் எப்போதும் நம்புகிறேன். நாங்கள் பாரதியர்கள், இந்தியா என்பது ஆங்கிலேயர்களால் வைக்கப்பட்ட பெயர், மேலும் நமது அசல் பெயரை ‘பாரத்’ அதிகாரப்பூர்வமாக திரும்பப் பெற நீண்ட காலமாகிவிட்டது. பிசிசிஐ மற்றும் ஜெய்ஷா இந்த உலகக் கோப்பையில் நமது வீரர்கள் நம் நெஞ்சில் பாரதம் இருப்பதை உறுதி செய்ய வேண்டும் என்று கேட்டுக்கொள்கிறேன்” என்று பதிவிட்டிருந்தார்.
இருப்பினும், பிசிசிஐ இதுவரை இதற்கு பதிலளிக்கவில்லை, மேலும் ஜெர்சியில் ‘பாரத்’ அல்லது ‘இந்தியா’ இடம்பெறுமா என்பது இன்னும் தெரியவில்லை. செப்டம்பர் 18 முதல் 22 வரை நடைபெறவுள்ள நாடாளுமன்றத்தின் சிறப்புக் கூட்டத் தொடருக்குப் பிறகு இந்த விவகாரம் தொடர்பான கூடுதல் தெளிவு வரும் என எதிர்பார்க்கப்படுகிறது.
