சாமராஜநகர் எம்பியும், முன்னாள் மத்திய அமைச்சரும், பாஜக தலைவருமான வி.ஸ்ரீனிவாஸ் பிரசாத் உடல்நலக்குறைவு காரணமாக காலமானார்.
கர்நாடகவில், சாமராஜநகர் எம்பியும், முன்னாள் மத்திய அமைச்சரும், பாஜக தலைவருமான வி.ஸ்ரீனிவாஸ் பிரசாத் உடல்நலக்குறைவு காரணமாக பெங்களூருவில் உள்ள தனியார் மருத்துவமனையில் அனுமதிக்கப்பட்டிருந்தார். மருத்துவமனையில் கடந்த நான்கு நாட்களாக ஐசியூவில் இருந்த அவர் இன்று அதிகாலை 1.27 மணியளவில் காலமானார்.
76 வயதான ஸ்ரீனிவாஸ் பிரசாத்துக்கு பிரசாத்துக்கு பாக்யலட்சுமி என்ற மனைவியும், பிரதிமா பிரசாத், பூர்ணிமா, பூனம் ஆகிய மூன்று மகள்களும் உள்ளனர். அவரது மருமகன் தேவராஜ் ஐஆர்எஸ் (வருவாய்) அதிகாரி, ஹைதராபாத்தில் ஜிஎஸ்டி கமிஷனராக பணியாற்றுகிறார். சாமராஜநகரில் இருந்து 6 முறை எம்.பி.யாகவும், மைசூரு மாவட்டம் நஞ்சன்கூடில் இருந்து இரண்டு முறை எம்.எல்.ஏ.வாகவும் இருந்தவர் சில காலமாக உடல் நலக்குறைவால் அவதிப்பட்டு வந்தார்.
ஸ்ரீனிவாஸ் பிரசாத் தனது அரசியல் வாழ்க்கையின் பொன் விழாவைத் தொடர்ந்து, மார்ச் 17 அன்று தனது அரசியல் ஓய்வை அறிவித்தார்.இருப்பினும், மைசூரில் உள்ள ஜெயலட்சுமிபுரத்தில் உள்ள அவரது இல்லம், அரசியல் செயல்பாடுகளால் பரபரப்பாக இருந்தது, முதல்வர் சித்தராமையா, முன்னாள் முதல்வர் பிஎஸ் எடியூரப்பா உள்ளிட்ட காங்கிரஸ் மற்றும் பா.ஜ.க.வை சேர்ந்த தலைவர்கள், அவருக்கு ஆதரவை கோருவதற்காக வருகை தந்தனர்.
1947 ஆம் ஆண்டு மைசூரில் உள்ள அசோகபுரத்தில் பிறந்த பிரசாத், 1974 இல் கிருஷ்ணராஜா சட்டமன்றத் தொகுதிக்கு சுயேட்சையாகத் தேர்தல் அரசியலில் நுழைந்தார். அவர் சிறுவயது முதல் RSS தொண்டராக இருந்தார். மேலும் ABVP ஆகியவற்றில் தீவிரமாக இருந்தார். ஒரு தலித் தலைவர் மற்றும் அரசியல்வாதி என்பதைத் தவிர, அவர் தனது தீவிர வாசிப்பு மற்றும் அறிவாற்றலுக்காக அறியப்பட்டார்.
ஸ்ரீனிவாஸ் பிரசாத் இதுவரை14 தேர்தல்களில் போட்டியிட்டு, 8ல் வெற்றி பெற்றுள்ளார். அவர் சாமராஜநகர் தொகுதியில் ஒன்பது மக்களவைத் தேர்தல்களில் போட்டியிட்டு ஆறில் வெற்றி பெற்றுள்ளார் என்பது குறிப்பிடத்தக்கது. 1999 முதல் 2004 வரை ஏபி வாஜ்பாய் அமைச்சரவையில் மத்திய அமைச்சராக, லோகஜனசக்தி எம்பியாக பணியாற்றினார். இரண்டு முறை எம்.எல்.ஏ.வாக தேர்ந்தெடுக்கப்பட்ட இவர், கர்நாடகா வருவாய்த்துறை அமைச்சராகவும் பணியாற்றியுள்ளார்.
பெங்களூரு மருத்துவமனையில் இருந்து காலை 7.30 மணிக்கு அவரது உடல் இல்லத்திற்கு வந்தடைந்தது , 9 மணிக்கு மைசூருவில் உள்ள தசரா கண்காட்சி மைதானத்தில் பொதுமக்கள் அஞ்சலிக்காக வைக்கப்படும். மறைந்த பாஜக எம்பி ஸ்ரீனிவாஸ் பிரசாத்துக்கு அஞ்சலி செலுத்த ஏராளமான அரசியல் தலைவர்கள் மற்றும் முக்கியஸ்தர்கள் வருகை தருவார்கள் என எதிர்பார்க்கப்படுகிறது.
