ஆக்ரோஷமான மற்றும் கொடூரமான நாய் இனங்களான ராட்வீலர்கள், பிட்புல்ஸ், டெரியர்கள்,உல்ஃப் நாய்கள் மற்றும் மாஸ்டிஃப்கள் ஆகியவற்றின் இறக்குமதி இனப்பெருக்கம் மற்றும் விற்பனை ஆகியவற்றை தடை செய்து மத்திய அரசு நடவடிக்கை எடுத்திருக்கிறது.
இந்த ஆக்ரோஷமான நாய்களின் உயிருக்கு ஆபத்துக்களை விளைவிக்கும் தாக்குதல்களை தொடர்ந்து இந்த நடவடிக்கை எடுக்கப்பட்டுள்ளதாக அரசு தரப்பு தெரிவித்துள்ளது. இந்த நாய்களை விற்பனை செய்வதற்கும், வளர்ப்பதற்கும் உரிமம் அல்லது அனுமதி வழங்குவதை தவிர்க்குமாறு உள்ளாட்சி அமைப்புகளை அதிகாரிகள் வலியுறுத்தியுள்ளனர்.
டெல்லி உயர் நீதிமன்றத்தின் உத்தரவை தொடர்ந்து கூட்டப்பட்ட நிபுணர்கள் மற்றும் விலங்குகள் நல அமைப்புகளின் குழு சமர்ப்பித்துள்ள அறிக்கையின் அடிப்படையில் இந்த உத்தரவு கலப்பின நாய்களுக்கும் நீட்டிக்கப்பட்டுள்ளது. தற்போது செல்லப் பிராணிகளாக வளர்க்கப்படும் இந்த நாய் இனங்கள் மேலும் இனப்பெருக்கம் செய்வதை தடுப்பதற்கு உடனடியாக கருத்தடை செய்யப்பட வேண்டும் என கால்நடை மற்றும் பால் பண்ணை துறை வலியுறுத்தியுள்ளது.
டிசம்பர் 6, 2023 தீர்ப்பில், தில்லி உயர் நீதிமன்றம் அனைத்து பங்குதாரர்களுடனும் கலந்தாலோசித்து முடிவெடுக்கும் செயல்முறையை விரைவுபடுத்துமாறு அரசாங்கத்திற்கு அறிவுறுத்தியது. மேலும், விலங்குகள் வதை தடுப்பு (நாய் வளர்ப்பு மற்றும் சந்தைப்படுத்தல்) விதிகள் 2017 மற்றும் விலங்குகள் வதை தடுப்பு (பெட் ஷாப்) விதிகள் 2018 ஆகியவற்றை உள்ளாட்சி அமைப்புகள் மற்றும் மாநில விலங்குகள் நல வாரியங்கள் மூன்று மாதங்களுக்குள் அமல்படுத்துவதை மாநிலங்கள் உறுதி செய்யுமாறு அரசு தெரிவித்துள்ளது.
தற்போது மத்திய அரசால் தடை செய்யப்பட்டுள்ள நாய் இனங்களின் பட்டியல்:
ராட்வீலர்கள், டெரியர்கள், பிட்புல் டெரியர்கள், டோகோ அர்ஜென்டினோஸ், அமெரிக்க புல்டாக்ஸ், போயர்போல், டோசா இனுஸ், அமெரிக்கன் ஸ்டாஃபோர்ட்ஷயர் டெரியர்கள், ஃபிலா பிரேசிலிரோ, கங்கல், மத்திய ஆசிய ஷெப்பர்ட் நாய்கள், காகசியன் ஷெப்பர்ட் நாய்கள் ஜப்பானிய டோசாஸ், அகிடாஸ், மாஸ்டிஃப்ஸ், தென் ரஷ்ய ஷெப்பர்ட் நாய், டோர்ன்ஜாக், சர்ப்லானினாக், ரோடீசியன் ரிட்ஜ்பேக், ஓநாய் நாய் , கேனரி நாய்கள், அக்பாஷ் , மாஸ்கோ காவலர்கள், கேன் கோர்சோஸ்.
