நடப்பு உலகக் கோப்பை செஸ் தொடரின் இறுதிப் போட்டிக்கு முன்னேறியுள்ளார் சென்னையை சேர்ந்த இந்திய கிராண்ட் மாஸ்டரான பிரக்ஞானந்தா. முதல் நிலை வீரரான நார்வேயின் மேக்னஸ் கார்ல்சனுடன் இறுதிப் போட்டியில் அவர் விளையாட உள்ளார்.
உலகக் கோப்பை செஸ் தொடரின் 10வது சீசன்அஜர்பைஜானில் உள்ள பாகு நகரில் நடைபெற்று வருகிறது. இந்தியா சார்பில் 10 வீரர்கள், 7 வீராங்கனைகள் பங்கேற்றுள்ளனர். இதன் அரை இறுதி ஆட்டத்தில் பிரக்ஞானந்தா, உலகத் தரவரிசையில் 2-வது இடத்தில் உள்ள அமெரிக்காவின் ஃபேபியானோ கருனாவுடன் மோதினார். முன்னதாக இருவரும் விளையாடிய இரண்டு ஆட்டமும் டிராவில் முடிந்தது. அதனால் டை பிரேக்கர் மூலம் வெற்றியாளரை உறுதி செய்யும் ஆட்டம் நடத்தப்பட்டது. பரபரப்பாக நடைபெற்ற இந்த ஆட்டத்தில் 3-5,2-5 என்ற புள்ளிக்கணக்கில் வீழ்த்தி, பிரக்ஞானந்தா வெற்றி பெற்றார்.
இந்த வெற்றியின் மூலம் உலகின் முதல் நிலை வீரரான நார்வேயின் மேக்னஸ் கார்ல்சனுடன் இறுதிப் போட்டியில் பிரக்ஞானந்தா விளையாட உள்ளார். இந்திய செஸ் ஜாம்பவான் விஸ்வநாதன் ஆனந்திற்கு பின் 20 ஆண்டுகள் கழித்து மீண்டும் ஒரு தமிழரான பிரக்ஞானந்தா செஸ் உலகக்கோப்பை இறுதிப்போட்டிக்கு முன்னேறியுள்ளார் என்பது குறிப்பிடத்தக்கது. அதுமட்டுமல்லாமல் செஸ் உலகக்கோப்பைத் தொடரின் இறுதிப்போட்டிக்கு முன்னேறிய மிகவும் இளவயது வீரர் என்ற வரலாற்று சாதனையையும் பிரக்ஞானந்தா படைத்துள்ளார். இதற்கு முன் 2005ஆம் ஆண்டு 22 வயதில் பொனோமரியோவ் இறுதிப்போட்டியில் ஆடியதே சாதனையாக இருந்தது. ஆனால் பிரக்ஞானந்தா 18 வயதிலேயே செஸ் உலகக்கோப்பை இறுதிப்போட்டிக்கு தகுதிபெற்றுள்ளார்.
