ஹிமாச்சல பிரதேசத்தில் கடந்த சில நாட்களாகவே கனமழை கொட்டித் தீர்த்து வருகிறது. இதனால், பல இடங்களில் வீடுகளும், சாலைகளும் சேதமாகின. கடந்த 13ஆம் தேதி சோலன் மாவட்டத்தில் ஜடோன் என்ற கிராமத்தில் மேக வெடிப்பு காரணமாக திடீரென கனமழை பெய்தது. இதனால், அங்கு வெள்ளக்காடாக காட்சியளித்தது. வீடுகள் வெள்ளத்தில் அடித்துச் செல்லப்பட்டன. 7 பேர் இடிபாடுகளில் சிக்கி உயிரிழந்தனர்.
இதேபோல், ஹிமாச்சல பிரதேச மாநிலத்தில் உள்ள பல்வேறு மாவட்டங்களில் பலர் உயிரிழந்துள்ளனர். அங்கு தொடர்ந்து கனமழை பெய்து வருகிறது. சிம்லாவில் சம்மர் ஹில் பகுதியில் நேற்று (ஆகஸ்ட் 15) கனமழையால் நிலச்சரிவு ஏற்பட்டது. அதேபோல், சிம்லாவின் கிருஷ்ணா நகர் பகுதியிலும் ஏற்பட்ட நிலச்சரிவில் சுமார் 7 வீடுகள் இடிந்து சேதமாகின. பாதிக்கப்பட்ட பகுதிகளில் சிக்கியுள்ள பொதுமக்களை தேசிய மற்றும் பேரிடர் மீட்புப் படையினர் மீட்டு, பாதுகாப்பான பகுதிக்கு அழைத்துச் செல்கின்றனர்.
இந்நிலையில், ஹிமாச்சல பிரதேசத்தில் மட்டும் கடந்த சில நாட்களில் மேக வெடிப்பு, கனமழை, நிலச்சரிவால் சுமார் 55 பேர் உயிரிழந்துள்ளதாக அதிர்ச்சி தகவல் வெளியாகியுள்ளது. இந்த தொடர் கனமழை, வெள்ள பாதிப்பு, மீட்பு மற்றும் நிவாரணப் பணிகள் தொடர்பாக முதலமைச்சர் சுக்விந்தர் சிங் சுகு, அதிகாரிகளுடன் உயர்மட்ட ஆலோசனை மேற்கொண்டார். மீட்புப் பணிகள் விரைவுபடுத்தப்பட்டுள்ளதாகவும், சுமார் 400 சாலைகள் இயல்பு நிலைக்குத் திரும்பியுள்ளதாகவும் அவர் தெரிவித்துள்ளார். மேலும், வெள்ளத்தால் பாதிக்கப்பட்ட பகுதிகளில் மின்சாரம், குடிநீர் உள்ளிட்ட அத்தியாவசிய தேவைகளை உடனடியாக செய்து தரவும் உத்தரவிடப்பட்டுள்ளதாக தெரிவித்தார்.
