புதுச்சேரியை சேர்ந்தவர் சி.செல்வராணி. இவரது தந்தை இந்து ஆதிதிராவிடர் வகுப்பைச் சேர்ந்தவர். தாய் கிறிஸ்தவ மதத்தைச் சேர்ந்தவர். செல்வராணி தேவாலயத்தில் ஞானஸ்நானம் பெற்றவர். இந்நிலையில், புதுச்சேரி அரசின் கிளார்க் பணியிடத்திற்கு பட்டியலின வகுப்பைச் சேர்ந்தவர் எனக்கூறி விண்ணப்பித்து செல்வராணி தேர்ச்சி பெற்றார்.
சாதிச் சான்றிதழ் சரிபார்ப்பின்போது அவர் கிறிஸ்தவ மதத்தைச் சேர்ந்தவர் என்பது தெரியவந்தது. இதையடுத்து, அவர் தனக்கு தனது தந்தை வகுப்பைச் சேர்ந்தவர் என சாதி சான்றிதழ் வழங்க வேண்டுமென விண்ணப்பித்திருந்தார். ஆனால், அவரது விண்ணப்பத்தை அதிகாரிகள் நிராகரித்துள்ளனர். இதை எதிர்த்து செல்வராணி சென்னை ஐகோர்ட்டில் வழக்கு தொடர்ந்தர். ஆனால், இந்த வழக்கில் உயர்நீதிமன்றம் பிறப்பித்த உத்தரவில், இடஒதுக்கீட்டு சலுகைகளைப் பெறுவதற்காக மதம் மாறுபவர்களுக்கு சாதிச் சான்றிதழ் வழங்க முடியாது எனக்கூறி மனுவை தள்ளுபடி செய்தது.
இதையடுத்து, சென்னை உயர்நீதிமன்றத்தில் உத்தரவை எதிர்த்து உச்சநீதிமன்றத்தில் மேல்முறையீடு செய்தார். இந்த வழக்கை விசாரித்த சுப்ரீம் கோர்ட், ”ஒரு மதத்தில் இருந்து மற்றொரு மதத்துக்கு மாறுவது என்பது அதன் கொள்கைகள் மற்றும் கோட்பாடுகளால் உண்மையாக ஈர்க்கப்பட்டிருக்க வேண்டும். ஆனால், உங்கள் நோக்கம் இடஒதுக்கீட்டின் பலனைப் பெறுவதற்கு மட்டுமே இருக்கிறது. பிற மதத்தின் மீது உண்மையான நம்பிக்கை இல்லாமல் இருந்தால், அதை ஒருபோதும் அனுமதிக்க முடியாது.
இதுபோன்ற இடஒதுக்கீட்டு கொள்கையையே கேலிக்கூத்தாக்கிவிடும். மனுதாரர் கிறிஸ்துவ மதத்தை தீவிரமாக கடைபிடிக்கும்போது, அரசு வேலைவாய்ப்புக்காக இந்துவாக தன்னை அடையாளப்படுத்துவதை ஏற்க முடியாது. மேலும், அது அரசியலமைப்பு சட்டத்தையே மோசடி செய்வதற்கு சமமாகும். எனவே, இந்த வழக்கில் சென்னை உயர்நீதிமன்றத்தின் தீர்ப்பை உச்சநீதிமன்றமும் உறுதி செய்து மனுதாரரின் வழக்கை தள்ளுபடி செய்தது.
Read More : வெள்ளி கொலுசை காலில் அணிவதால் இவ்வளவு நன்மைகளா..? பெண்களே இனியும் தவிர்க்காதீங்க..!!
