சென்னை துறைமுகம் பகுதியில் இருந்து திருவொற்றியூர் அருகேயுள்ள திருச்சினாகுப்பம் பகுதியில் உள்ள எண்ணெய் நிறுவனத்திற்கு, சமையல் எண்ணெய் குழாய்களின் மூலம் அனுப்பப்பட்டு வருகிறது. இந்த குழாயில் ஏற்பட்ட விரிசலால், காசிமேடு பகுதியில் மீனவர்கள் படகு நிறுத்துமிடத்தில் சமையல் எண்ணெய் குளம் போல் தேங்கியுள்ளது.
மலேசியாவில் இருந்து இறக்குமதி செய்யப்படும் சமையல் எண்ணெய் கப்பல்கள் மூலம் சென்னை துறைமுகத்திற்கு கொண்டுவரப்படும் பாமாயில் எண்ணெய், திருச்சினாகுப்பம் பகுதியில் செயல்பட்டுவரும் தனியாருக்கு சொந்தமான எண்ணெய் நிறுவனத்திற்கு ராட்சத குழாய்கள் மூலம் அனுப்பப்படுவது வழக்கம்.
குழாய்களின் மூலம் பெறப்படும் எண்ணெய் அங்கு சுத்திகரிக்கப்பட்டு, பாக்கெட்டுகள் மற்றும் டின்களில் அடைக்கப்படுகிறது. இதன் பின்னர் அங்கிருந்து விற்பனைக்கு அனுப்பப்படுகிறது. இந்த நிலையில், எண்ணூர் நெடுஞ்சாலை பகுதியில் அமைக்கப்பட்டுள்ள குழாயில் நேற்று பிற்பகல் விரிசல் ஏற்பட்டு எண்ணெய் கசிந்ததால், அதனை அப்புறப்படுத்த வேண்டும் என்று காசிமேடு மீனவர்கள் கோரிக்கை விடுத்துள்ளனர்.
