குறைந்த விலையில் பட்டாசுகளை தருவதாக ஆன்லைனில் மோசடி நடைபெற்று வரும் நிலையில், பொதுமக்கள் உஷாராக இருக்கும்படி சைபர் கிரைம் எச்சரித்துள்ளது.
இது தொடர்பாக, தமிழ்நாடு காவல்துறை இணைய தள குற்றப்பிரிவு, தலைமையகம் வெளியிட்டுள்ள செய்திக்குறிப்பில், “தீபாவளி பண்டிகையை முன்னிட்டு பட்டாசுகளுக்கான தேவை அதிகரிப்பதால், சில நேரங்களில் சைபர் குற்றவாளிகள் போலி இணையதளங்களை உருவாக்கி நம்பமுடியாத விலையில் பட்டாசுகளை வழங்குவதாக உறுதியளித்து மோசடி செய்ய வாய்ப்பு உள்ளது.
எனவே, பொதுமக்கள் இந்த மோசடித் திட்டத்தைப் பற்றிய விழிப்புணர்வோடு இருப்பதும், இத்தகைய மோசடிகளில் இருந்து பாதுகாத்துக் கொள்வதும் அவசியமாகும்” என குறிப்பிடப்பட்டுள்ளது. பாதிக்கப்பட்டவர்கள், பட்டாசுகள் நம்ப முடியாத விலையில் கிடைப்பதான விளம்பரத்தை யூடியூபில் பார்க்கிறார்கள். பாதிக்கப்பட்டவர் வீடியோவில் குறிப்பிடப்பட்டுள்ள வாடிக்கையாளர் சேவை எண்ணைத் தொடர்பு கொண்டு ஆர்டரைப் பற்றி விசாரிக்கிறார். கஸ்டமர் கேர் நபர் பாதிக்கப்பட்டவரின் அழைப்பிற்கு பதிலளித்து, ஆர்டர் செய்த பிறகு ஸ்கிரீன் ஷாட்டைப் பகிருமாறு அவருக்குத் தெரிவிக்கிறார். பாதிக்கப்பட்டவர் வீடியோவில் குறிப்பிடப்ப ட்டுள்ள https://luckycrackers.com/ என்ற இணையதளத்திற்குச் சென்று ஆர்டரைச் செய்கிறார்.
பின்னர் வாட்ஸ் அப் மூலம் வாடிக்கையாளர் சேவை எண்ணுக்கு ஆர்டரின் ஸ்கிரீன் ஷாட்டை அனுப்புகிறார். விலைகள் மிகவும் குறைவாக இருப்பதால், ஆர்டர்களை ஆர்வத்துடன் செய்கிறார்கள். ஆர்டருக்கான பணம் செலுத்தப்பட்டவுடன், இணைய தளத்தில் குறிப்பிடப்பட்ட தொடர்பு எண் மற்றும் இணையதளம் அணுக முடியாததாகிவிட்டதை பாதிக்கப்பட்டவர்கள் உணர்கிறார்கள். அவர்கள் கஷ்டப்பட்டு சம்பாதித்த பணத்தையும் இழந்து பட்டாசுகளும் வழங்கப்படாததால் அவர்கள் மிகவும் ஏமாற்றம் அடைகின்றனர்.
