மழைக்காலம் தொடங்கிவிட்டாலே நோய்களின் பரவல் அதிகரிக்கும். அந்த வகையில், தமிழ்நாட்டிலும் பருவநிலை மாற்றம் காரணமாக டெங்கு உள்ளிட்ட பல்வேறு நோய்கள் வேகமாக பரவி வருகின்றன. குறிப்பாக, டெங்கு பாதிப்பு பல மாவட்டங்களில் அதிகரித்து காணப்படுகிறது.
இந்நிலையில், திருப்பத்தூர் மாவட்டம் சிவராஜ்பேட்டை பகுதியில் டெங்கு காய்ச்சலால் 4 வயது சிறுமி அபிநிதி உயிரிழந்த சம்பவம் அதிர்ச்சியை ஏற்படுத்தியுள்ளது. அப்பகுதியை சேர்ந்த மணிகண்டன் சுமித்ரா தம்பதிக்கு 5 குழந்தைகள் இருக்கின்றனர். இதில் கடந்த 23ஆம் தேதி யோகலட்சுமி, அபிநிதி, புருஷோத்தமன் ஆகிய 3 குழந்தைகளுக்கு டெங்கு பாதிப்பு ஏற்பட்டதை தொடர்ந்து மருத்துவனையில் அனுமதிக்கப்பட்டனர்.
இந்நிலையில், டெங்குவால் பாதிக்கப்பட்டு மேல் சிகிச்சைக்காக கடந்த செவ்வாய்க்கிழமை அரசு மருத்துவமனையில் அனுமதிக்கப்பட்ட அபிநிதி, இன்று சிகிச்சை பலனின்றி உயிரிழந்தார். இதை தொடர்ந்து மருத்துவர்கள் சிறுமியின் உடலை பெற்றோரிடம் ஒப்படைத்தனர். திருப்பத்தூர் பகுதியில் ஒரே குடும்பத்தில் 3 குழந்தைகளுக்கு டெங்கு பாதிப்பு உறுதியான நிலையில், அதில் ஒரு குழந்தை உயிரிழந்த சம்பவம் அதிர்ச்சியையும், சோகத்தையும் ஏற்படுத்தியுள்ளது.
