மயிலாடுதுறை மாவட்டம் குத்தாலம் சாலிய தெருவைச் சேர்ந்தவர் சரவணன். இவர் நாமக்கல் மாவட்டம் சிக்கல் ஊரைச் சேர்ந்த நந்தினி (25) என்ற இளம்பெண்ணை திருமணம் செய்திருக்கிறார். கடந்த பிப்ரவரி மாதம் தான் இவர்களின் திருமணம் நடந்தது. இந்நிலையில், கடந்த 5ஆம் தேதி அன்று சரவணனை நந்தினியும் அவரது கள்ளக்காதலன் ராஜசேகரன் ஆகிய இருவரும் சேர்ந்து கட்டிப் போட்டு கழுத்தை அறுத்துவிட்டு தப்பிச் சென்றுள்ளனர். பின்னர், இதுகுறித்து பாதிக்கப்பட்ட சரவணன், குத்தாலம் போலீசில் புகார் அளித்தார். இதையடுத்து, போலீசார் கொலை முயற்சி வழக்குப்பதிவு செய்து விசாரணை நடத்தி நந்தினி மற்றும் அவரது கள்ளக்காதலன் ராஜசேகர் ஆகிய இருவரையும் கைது செய்தனர்.
அவர்களிடம் நடத்திய விசாரணையில், திருமணத்திற்கு முன்பு ராஜசேகரனுடன் தனக்கு பழக்கம் இருந்தது. பெற்றோரின் வற்புறுத்தலின் பேரில் தான் சரவணனை திருமணம் செய்து கொண்டேன். திருமணத்திற்கு பிறகு ராஜசேகரை என்னால் மறக்க முடியவில்லை. அதனால் இருவரும் தொடர்பில் இருந்தோம். இதை அறிந்த தனது சரவணன் என்னை கண்டித்தார். இதனால் ஆத்திரம் அடைந்து இருவரும் சேர்ந்து கணவனை கட்டிப்போட்டு கழுத்தை அறுத்துவிட்டு தப்பிச் சென்றோம் என்று போலீசிடம் வாக்குமூலம் அளித்திருக்கிறார் நந்தினி. இதையடுத்து, இருவரையும் நீதிமன்றத்தில் ஆஜர்படுத்தி போலீசார் சிறையில் அடைத்தனர்.
