திமுக உட்கட்சித் தேர்தலில் தலைவர், பொதுச்செயலாளர் உள்ளிட்ட பொறுப்புகளுக்கு தேர்தல் நடைபெறும் என திமுக தலைமைக் கழகம் அறிவித்துள்ளது.
திமுக 15-வது உட்கட்சித் தேர்தல் கடந்த 2020ஆம் ஆண்டு தொடங்கி கொரோனா காரணமாக இந்த ஆண்டு வரை நடைபெற்று வருகிறது. கடந்த செப்.22ஆம் தேதி முதல் 25ஆம் தேதி வரை மாவட்ட செயலாளர், அவைத்தலைவர், 3 துணைச்செயலாளர்கள், பொருளாளர், செயற்குழு, பொதுக்குழு உறுப்பினர்களுக்கான வேட்பு மனுத்தாக்கல் அண்ணா அறிவாலயத்தில் நடைபெற்றது. இதற்கான முடிவுகள் சில தினங்களுக்கு முன்பு வெளியானது. 72 மாவட்டங்களில் 71 மாவட்டச் செயலாளர்கள் நியமனம் செய்யப்பட்டனர். 7 மாவட்டங்களுக்கு புதிய செயலாளர்கள் நியமிக்கப்பட்டனர்.
இந்நிலையில் திமுக தலைவர், பொதுச்செயலாளர் உள்ளிட்ட பொறுப்புகளுக்கு தேர்தல் நடைபெறும் என திமுக தலைமைக் கழகம் அறிவித்துள்ளது. இதுகுறித்து திமுக பொதுச்செயலாளரும், நீர்வளத்துறை அமைச்சருமான துரைமுருகன் வெளியிட்டுள்ள அறிக்கையில், ”தேர்ந்தெடுக்கப்பட்டுள்ள ஒன்றிய – நகர – நகரிய – பேரூர் – பகுதிக் கழகச் செயலாளர்கள், மாவட்ட, மாநகரக் கழகச் செயலாளர்கள் மற்றும் நிர்வாகிகள், தலைமைச் செயற்குழு – பொதுக்குழு உறுப்பினர்கள் அடங்கிய புதிய பொதுக்குழு கூட்டம் அக்டோபர் மாதம் 10ஆம் தேதி சென்னையில் நடைபெறும்.
திமுக தலைவர், பொதுச்செயலாளர், பொருளாளர் மற்றும் 4 தணிக்கைக்குழு உறுப்பினர்களுக்கான தேர்தல் நடைபெறும். இந்த பொறுப்புகளுக்கான வேட்புமனுக்கள் அக்டோபர் 7ஆம் தேதி தலைமைக் கழகத்தில் பெற்றுக் கொள்ளப்படும். அனைத்து நடைமுறைகளிலும் கழகத் தேர்தல் விதிமுறைகளைக் கடைபிடிக்க வேண்டும்” என தெரிவிக்கப்பட்டுள்ளது.