பெட்ரோல், டீசல் விலை குறைப்பது தொடர்பாக இன்று முக்கிய அறிவிப்பு வெளியாக வாய்ப்புள்ளதாக தகவல் வெளியாகியுள்ளது.
நாடாளுமன்ற சிறப்பு கூட்டத் தொடர் வரும் 18ஆம் தேதி முதல் 20ஆம் தேதி வரை நடைபெற உள்ளது. இதில் 18ஆம் தேதி நாடாளுமன்ற சிறப்பு கூட்டத்தொடர் பழைய பாராளுமன்ற கட்டிடத்திலும், 19ஆம் தேதி முதல் புதிய கட்டிடத்திலும் நடைபெறவுள்ளது.
இந்நிலையில், டெல்லியில் பிரதமர் மோடி தலைமையில் இன்று மத்திய அமைச்சரவைக் கூட்டம் கூடுகிறது. இந்த அமைச்சரவைக் கூட்டத்தில் முக்கிய விவகாரங்கள் குறித்து விவாதிக்க வாய்ப்பு உள்ளதாக கூறப்படுகிறது.
மேலும், 5 மாநில தேர்தல் மற்றும் மக்களவை தேர்தல் வருவதை முன்னிட்டு பெட்ரோல், டீசல் விலையை குறைத்து அதற்கான அறிவிப்பும் இன்று வெளியாக இருப்பதாக தகவல் வெளியாகியுள்ளது. கடந்த முறை நடந்த இக்கூட்டத்தில் சமையல் சிலிண்டர் விலை ரூ.200 குறைக்கப்பட்டது குறிப்பிடத்தக்கது. எனவே, இந்த அமைச்சரவைக் கூட்டம் முக்கியமானதாக பார்க்கப்படுகிறது.
