தூத்துக்குடி மாவட்டம் அண்ணாநகர் 4-வது தெருவைச் சேர்ந்தவர் ஆவுடையப்பன் என்ற வன்னியராஜ். இவரது மனைவி கடந்த சில ஆண்டுகளுக்கு முன்னர் கணவரை விட்டு பிரிந்து, பெயிண்டர் சுடலைமணி என்பவருடன் வசித்து வருகிறார். ஆவுடையப்பன் தனது மகன் கணேசனுடன் (24) தனியாக வசித்து வந்தார். மனைவி பிரிந்து சென்றது தொடர்பாக ஆவுடையப்பன் மற்றும் சுடலைமணி இடையே முன் விரோதம் இருந்துள்ளது. இந்நிலையில், நேற்று நள்ளிரவு டி.எம்.பி. காலனி பகுதியில் ஆவுடையப்பனின் மகன் கணேசன் தனது நண்பர்களுடன் நின்று கொண்டிருந்தார். அப்போது அங்கு வந்த ஒருவர், தான் மறைத்து வைத்திருந்த அரிவாளை எடுத்து கணேசனை சரமாரியாக வெட்டியுள்ளார்.
இதில் ரத்த வெள்ளத்தில் கணேசன், சம்பவ இடத்திலேயே சரிந்ததும், அவரது நண்பர்கள் கூடுவதை பார்த்து தாக்குதல் நடத்திய நபர் தப்பியோடினார். பின்னர் போலீசார் மற்றும் அப்பகுதியினர் கணேசனை மீட்டு தூத்துக்குடி அரசு மருத்துவமனையில் அனுமதித்தனர். அங்கு அவருக்கு தீவிர சிகிச்சை அளித்தபோதும், பலன் அளிக்காமல் கணேசன் உயிரிழந்தார். இது தொடர்பான விசாரணையில், சுடலைமணிதான் கொலை செய்ததும், அவர் தலைமறைவானதும் தெரியவந்தது. இதனால் முன்விரோதம் காரணமாக அவர் கொலை செய்திருக்கலாம் என்ற சந்தேகத்தின் பேரில் போலீசார் அவரை தேடி வருகின்றனர். மேலும் கணேசனை வெட்டிக்கொலை செய்த சம்பவத்தில் வேறு யாருக்கும் தொடர்பு உள்ளதா? என்றும் தீவிர விசாரணை நடத்தி வருகின்றனர்.
