ஒருசிலர் கட்டணத்தை செலுத்தவில்லை என்பதற்காக ஒட்டு மொத்த குடியிருப்புகளுக்கும் குடிநீர், கழிவுநீர் இணைப்பை துண்டிக்க முடியாது என சென்னை உயர்நீதிமன்றம் தெரிவித்துள்ளது.
சென்னை மயிலாப்பூரில் உள்ள அடுக்குமாடி குடியிருப்பு ஒன்றில் 15 குடும்பங்கள் வசித்து வருகின்றன. அதில், ஒரு குடும்பத்தினர் மட்டும் குடிநீர் மற்றும் கழிவுநீருக்கான கட்டணத்தை செலுத்தவில்லை எனக்கூறி ஒட்டுமொத்த குடியிருப்புகளுக்கும் குடிநீர் மற்றும் கழிவுநீர் இணைப்பை துண்டிக்க சென்னை பெருநகர குடிநீர் வழங்கல் மற்றும் கழிவுநீர் அகற்றும் வாரிய அதிகாரிகள் நடவடிக்கை எடுத்துள்ளனர். இதனை எதிர்த்து அந்த குடியிருப்பில் வசிக்கும் எஸ்.வாசுதேவன் என்பவர் சென்னை ஐகோர்ட்டில் வழக்கு தொடர்ந்தார்.
இந்த வழக்கை விசாரித்த நீதிபதி சி.சரவணன் பிறப்பித்துள்ள உத்தரவில், “குடியிருப்பில் வசிக்கும் ஒருசிலர் உரிய கட்டணத்தை செலுத்தவில்லை என்பதற்காக ஒட்டுமொத்த குடியிருப்புகளுக்கும் குடிநீர் மற்றும் கழிவுநீர் இணைப்பை துண்டிக்க முடியாது. ஒருவருக்காக மற்ற குடும்பத்தினரை கஷ்டப்படுத்த முடியாது. கட்டணத்தை யார் செலுத்த வில்லையோ அவரிடமிருந்து நிலுவைத் தொகையை வசூலிக்க வேண்டும். சிலர் செய்யும் தவறுக்கு அனைவரும் பொறுப்பாக முடியாது. எனவே, அனைத்து குடியிருப்புகளுக்கும் குடிநீர் மற்றும் கழிவுநீர் இணைப்பைத் துண்டிக்க சென்னை பெருநகர குடிநீர் வழங்கல் மற்றும் கழிவுநீர் அகற்றும் வாரியம் எடுத்துள்ள நடவடிக்கைக்கு தடை விதிக்கப்படுகிறது” என உத்தரவிட்டுள்ளார்.
