மத்திய அரசு ஊழியர்களுக்கு கூடிய விரைவில் ஒரு மிகப்பெரிய நல்ல செய்தி கிடைக்கப்போகிறது. இந்த செய்தியானது ஊழியர்களின் பணப்பையை நிரப்ப போகிறது. ஏனென்றால், மத்திய அரசு தனது ஊழியர்களின் அகவிலைப்படியை பெரிய அளவில் உயர்த்தப்போவதாக தகவல்கள் தெரிவிக்கின்றன. அகவிலைப்படி உயர்வு மட்டுமின்றி, ஓய்வூதியதாரர்களுக்கான அகவிலை நிவாரணத்தையும் (டிஆர்) அதிகரிக்க வாய்ப்புள்ளதாக கூறப்படுகிறது. இந்த ஆண்டின் செப்டம்பர் மாதத்தில் மத்திய அரசு தனது ஊழியர்களுக்கான அகவிலைப்படியை 4% உயர்த்தியதன் மூலம் ஊழியர்களின் மொத்த அகவிலைப்படி 38% அதிகரித்தது.
செப்டம்பர் மாதத்தில் அகவிலைப்படியை உயர்த்துவதற்கு முன்னர் வரை மத்திய அரசு ஊழியர்கள் 34% அகவிலைப்படியை பெற்று வந்தனர். கொரோனா பரவல் சமயத்தில் பல துறைகளில் ஏற்பட்ட முடக்கத்தின் காரணமாக அரசு தனது ஊழியர்களுக்கு அகவிலைப்படியில் எவ்வித மாற்றத்தையும் மேற்கொள்ளவில்லை. அதுமட்டுமின்றி இந்த சமயத்தில் ஊழியர்களுக்கு அகவிலைப்படியையும் அரசு வழங்கவில்லை. இதன் நிலுவைத் தொகையும் இன்று வரை வழங்கப்படாமல் இருந்து வருகிறது. மத்திய அரசு ஊழியர்களும் நீண்ட நாட்களாகவே தங்களது 18 மாத நிலுவைத் தொகையை அரசு வழங்க வேண்டும் என்று தொடர்ந்து கோரிக்கை வைத்து வருகின்றனர்.
பொதுவாக மத்திய அரசு ஊழியர்களுக்கான அகவிலைப்படி (டிஏ) மற்றும் ஓய்வூதியதாரர்களுக்கான அகவிலை நிவாரணம் (டிஆர்) ஆகிய இரண்டையும் ஆண்டுக்கு இருமுறை வீதத்தில், அதாவது ஜனவரியிலும் பின்னர் ஜூலையிலும் என இரண்டு முறை திருத்தங்களை மேற்கொள்ளும். தற்போது புத்தாண்டு நெருங்கி வருகிறது. இந்த சந்தோஷமான சமயத்தில் ஊழியர்களை இரட்டிப்பு மகிழ்ச்சியில் மூழ்கடிக்க செய்யும் வகையில் அரசு அவர்களுக்கு அகவிலைப்படியை உயர்த்தும் என்று கூறப்படுகிறது. மார்ச் 2023-க்குள் மத்திய அரசு ஊழியர்களுக்கு 3 முதல் 5 சதவீதம் அகவிலைப்படி உயர்வு கிடைக்கும் என்று எதிர்பார்க்கப்படுகிறது.
