தங்கக் கடன் விநியோகத்தில் வங்கிகள், நிறுவனங்களின் குறைபாடுகளை ரிசர்வ் வங்கி சுட்டிக் காட்டியுள்ள நிலையில், இதனை சரிசெய்ய புதிய அணுகுமுறையைக் கொண்டு வர வங்கிகள் யோசித்து வருகின்றன. கடன் தொடங்கப்பட்ட உடனேயே வட்டி மற்றும் அசலை சமமான மாதத் தவணைகளில் செலுத்துவதற்கான புதிய கொள்கை நடைமுறையில் உள்ளது.
இது தவிர, கடன் வழங்குநர்கள் தங்கத்திற்கு எதிராக கடன் வழங்குவதற்கான காலக் கடன் வழியையும் ஆராய்ந்து வருகின்றனர். இதுகுறித்து வங்கியின் மூத்த அதிகாரி ஒருவர் கூறுகையில், ”கடனாளிகளின் திருப்பிச் செலுத்தும் திறனைப் பார்க்கவும், அடமானத்தை மட்டும் நம்பாமல் இருக்கவும் கடன் வழங்குநர்களுக்கு ரிசர்வ் வங்கி அறிவுறுத்தியுள்ளது. கடனை திருப்பிச் செலுத்துவதில் சில தவறுகள் ஏற்படலாம் என ரிசர்வ் வங்கி தெரிவித்துள்ளது. இதன் மூலம், தங்கக் கடனுக்கான மாதாந்திர கட்டண விருப்பங்கள் உருவாக்கப்பட உள்ளது” என்று கூறினார்.
செப்டம்பர் 30ஆம் தேதி வெளியிடப்பட்டுள்ள சுற்றறிக்கையில், தங்க நகைகளுக்கு கடன் வழங்கியதில் முறைகேடுகள் நடைபெற்றுள்ளதாக ரிசர்வ் வங்கி தெரிவித்துள்ளது. ஆதாரம், மதிப்பீடு இறுதிப் பயன்பாட்டுக் கண்காணிப்பு, ஏல வெளிப்படைத்தன்மை, தங்கக் கடனுக்கான ஆபத்து எடைகளைப் பயன்படுத்துதல் ஆகியவற்றில் உள்ள சிக்கல்களைக் கண்டறிந்த பின்னர் சுற்றறிக்கை வெளியிடப்பட்டது. பொதுவாக தங்கக் கடன் வழங்குபவர்கள் கடனை விரைவாக திருப்பிச் செலுத்தும் விருப்பத்தை வழங்குகிறார்கள்.
கடன் வாங்கியவர் கடன் தொகையை ஒரே நேரத்தில் திருப்பிச் செலுத்த வேண்டும். அல்லது பகுதியளவு பணத்தைத் திரும்பப் பெறுவதற்கான மற்றொரு விருப்பம் உள்ளது. கடன் வாங்கியவர் அசல், வட்டியை உரிய தேதிக்குள் செலுத்த வேண்டும். இத்துடன் தங்கக் கடனை இஎம்ஐ மூலம் செலுத்தும் புதிய வசதியும் ஏற்படுத்தப்படும். செப்டம்பர் 30ஆம் தேதி வரை வங்கிகள் ரூ.1.4 லட்சம் கோடி நகைக்கடனாக வழங்கப்பட்டுள்ளது. இது கடந்தாண்டைவிட 51% அதிகமாகும். தங்கம் விலை உயர்வால், தங்கத்திற்கு கடன் வாங்குவோர் எண்ணிக்கை அதிகரித்து வருவதாக சொல்லப்படுகிறது.
