உலகக்கோப்பையில் பாகிஸ்தான் அணி பங்கேற்காவிட்டால், பிளான்-B-யில் வேறு அணிக்கு வாய்ப்பு வழங்கப்படும் என்று ஐசிசி முடிவெடுத்துள்ளதாக தகவல்கள் தெரிவிக்கின்றன.
ஐசிசி ஒருநாள் உலகக்கோப்பை தொடர் 2011க்கு பிறகு, இந்தியாவில் இந்த ஆண்டு நடைபெறுகிறது. அக்டோபர் 5 ஆம் தேதி தொடங்கவுள்ள முதல் போட்டியில் இங்கிலாந்து மற்றும் நியூசிலாந்து அணிகள் குஜராத் நரேந்திரமோடி ஸ்டேடியத்தில் மோதுகின்றன. மொத்தம் 10 அணிகள் பங்கேற்கும் இந்த உலகக்கோப்பையில் 8 அணிகள் ஏற்கனவே தகுதி பெற்றுள்ளன. மற்ற இரண்டு அணிகளுக்கான தகுதிச்சுற்று போட்டிகள் ஜிம்பாப்வேயில் நடைபெற்று வருகிறது. உலகக்கோப்பை தொடர் இந்தியாவில் நடைபெறுவதால், பாகிஸ்தான் அணிக்கு புதிய சிக்கல் ஏற்பட்டுள்ளது. பாக். அரசு அனுமதி அளித்தால் மட்டுமே அந்த அணி இந்தியாவிற்கு பயணம் மேற்கொள்ளும், இல்லாவிடில் உலகக்கோப்பையை புறக்கணிக்கவுள்ளதாக தகவல்கள் தெரிவிக்கின்றன.
இந்த நிலையில் பாகிஸ்தான் அணி, இந்தியாவில் நடைபெறும் உலகக்கோப்பை தொடரை புறக்கணிக்க முடிவு செய்தால், ஐசிசி (பிளான்-B) வேறு முடிவுக்கு தயாராகி விட்டது. அதாவது பாகிஸ்தான் அணி பங்கேற்காவிட்டால், அந்த அணி தொடரிலிருந்து நீக்கப்பட்டு வேறு அணிக்கு வாய்ப்பு வழங்கப்படும் என தகவல்கள் தெரிவிக்கின்றன. ஐசிசி உலகக்கோப்பை தகுதிச்சுற்று போட்டிகளில் இருந்து ஒரு அணிக்கு இந்த வாய்ப்பு வழங்கப்படுகிறது. பாகிஸ்தான் அணி, கடைசியாக 2016இல் இந்தியாவில் நடைபெற்ற டி-20 உலகக்கோப்பை தொடரருக்காக, இந்தியா வந்திருந்தது குறிப்பிடத்தக்கது.
