இந்தியா-பாகிஸ்தான் இடையிலான உலகக்கோப்பை கிரிக்கெட் போட்டி அகமதாபாத்தில் உள்ள நரேந்திர மோடி மைதானத்தில் நடத்த முடிவு செய்துள்ளதாக பிசிசிஐ வட்டாரங்கள் தகவல் தெரிவிக்கின்றன.
கிரிக்கெட்டில் பரம போட்டியாளராக வலம் வரும் இந்தியா – பாகிஸ்தான் உலகக்கோப்பை கிரிக்கெட் போட்டிக்காக இரு நாட்டு ரசிகர்களும் ஆவலுடன் காத்திருக்கின்றனர். 2016ம் ஆண்டுக்குப் பிறகு இந்திய மண்ணில் நேருக்கு நேர் இவ்விரு அணிகளும் மோதும் போட்டி என்பதால், ஏராளமான ரசிகர்கள் திரள்வார்கள். இந்நிலையில், இந்திய கிரிக்கெட் கட்டுப்பாட்டு வாரியம் (பிசிசிஐ) இந்தியா-பாகிஸ்தான் இடையிலான போட்டியை பார்ப்பதற்கு வெளிநாட்டிலிருந்து இந்தியாவுக்கு ஏராளமான ரசிகர்கள் வருகை தருவார்கள் என்பதால், 1 லட்சம் பேர் அமரும் திறன் கொண்ட நாட்டிலேயே மிகப்பெரிய மைதானமான அகமதாபாத்தில் உள்ள நரேந்திர மோடி ஸ்டேடியத்தில் இந்திய கிரிக்கெட் கட்டுப்பாட்டு வாரியம் (பிசிசிஐ) முக்கிய போட்டியை நடத்த முடிவு செய்துள்ளது.
தற்போது நடைபெற்று வரும் இந்தியன் பிரீமியர் லீக் போட்டிகள் முடிவடைந்தவுடன் உலகக் கோப்பை அட்டவணையை பிசிசிஐ பிரமாண்டமாக வெளியிடும் எனத் தெரிகிறது. அதனை வைத்து பார்த்தால் போட்டி அக்டோபர் 7ஆம் தேதி நடைபெறும் என தெரிகிறது. மேலும், அக்டோபர்-நவம்பர் மழைக்காலமாக இருப்பதால், நவம்பர் முதல் வாரத்திற்கு முன்னதாக நாட்டின் தெற்கு பகுதிகளில் போட்டிகளை முடிக்க பிசிசிஐ திட்டமிட்டுள்ளது என்பதும் குறிப்பிடத்தக்கது.
மேலும், இந்த ஆண்டு சர்வதேச கிரிக்கெட் கவுன்சில் (ஐ.சி.சி) நடத்தும் ஒருநாள் (50 ஓவர்) உலகக்கோப்பை தொடர் இந்தியாவில் நடைபெற உள்ளது. இந்த தொடருக்கான போட்டிகள் வருகிற அக்டோபர் 5 முதல் தொடங்க உள்ளது. நாக்பூர், பெங்களூரு, திருவனந்தபுரம், மும்பை, டெல்லி, லக்னோ, கவுகாத்தி, ஐதராபாத், கொல்கத்தா, ராஜ்கோட், இந்தூர், பெங்களூரு மற்றும் தர்மஷாலா ஆகிய நகரங்களில் பயிற்சி போட்டிகள் மற்றும் லீக் சுற்று போட்டிகள் நடைபெற உள்ளது. இந்த மைதானங்களில், 7 மைதானங்கள் மட்டுமே இந்தியாவின் லீக் போட்டிகளை நடத்தும். இந்திய அணி இறுதிப் போட்டிக்கு முன்னேறினால், அகமதாபாத் மட்டுமே இந்தியா இரண்டு போட்டிகளில் விளையாடும்.
பாதுகாப்பு காரணங்களுக்காக பாகிஸ்தான் தனது பெரும்பாலான போட்டிகளை சென்னை மற்றும் பெங்களூருவில் விளையாட முடியும் என்று தெரிகிறது. கொல்கத்தாவின் ஈடன் கார்டன் மைதானமும் ஒரு இடமாக கருதப்படுகிறது. இதேபோல், வங்கதேசம் தனது பெரும்பாலான போட்டிகளை கொல்கத்தா மற்றும் கவுகாத்தியில் விளையாடலாம். ஏனெனில் இது அண்டை நாட்டிலிருந்து வரும் ரசிகர்களின் பயண தூரத்தை குறைக்கும்.
