இந்தியாவுக்கும் கனடாவுக்கும் இடையே மோதல்கள் நிலவி வரும் நிலையில், பயங்கரவாதத்துடன் தொடர்புடைய நபர்களை நேர்காணல் செய்வதைத் தவிர்க்குமாறு அனைத்து செய்தி சேனல்களுக்கும் மத்திய அரசு அறிவுறுத்தியுள்ளது.
சீக்கிய பிரிவினைவாத தலைவர் ஹர்தீப் சிங் படுகொலை செய்யப்பட்டதில் இந்தியாவுக்கு பங்கு இருப்பதாக கனடா பிரதமர் ஜஸ்டின் பகிரங்கமாக குற்றம் சாட்டியது தொடர்பாக இந்தியாவிற்கும் கனடாவிற்கும் இடையிலான உறவு மோசமடைந்து வருகிறது. இந்தநிலையில், பயங்கரவாத அமைப்பை சேர்ந்தவர் என்று கூறப்படும் குருபத்வந் சிங் பண்ணு என்பவர் ஒரு தொலைக்காட்சி சேனலில் விவாத நிகழ்ச்சியில் கலந்துகொண்டு பேசியுள்ளார்.
அதாவது, வெளிநாட்டில் வசித்து வரும் ஒரு நபர், குறிப்பாக அவர் மீது பல கிரிமினல் வழக்குகளும் இருந்து வரும் நிலையில், மேலும் இந்தியாவால் தடை செய்யப்பட்ட ஒரு அமைப்பில் இருக்கும் நபரை அழைத்து, ஒரு தொலைக்காட்சி நிகழ்வில் பேசவைத்துள்ளதாகவும். அதில் அந்த நபர் நாட்டின் இறையாண்மை/ஒருமைப்பாடு, இந்தியாவின் பாதுகாப்பு, அந்நிய மாநிலங்களுடனான இந்தியாவின் நட்புறவு மற்றும் நாட்டில் பொது ஒழுங்கை சீர்குலைக்கும் சாத்தியக்கூறுகள் கொண்ட பல கருத்துக்களை பகிர்ந்துள்ளதாகவும் மத்திய அமைச்சகம் தெரிவித்துள்ளது.
மத்திய அரசு ஊடக சுதந்திரத்தை நிலைநிறுத்துகிறது மற்றும் அரசியலமைப்பின் கீழ் அதன் உரிமைகளை மதிக்கிறது, ஆனால் டிவி சேனல்களால் ஒளிபரப்பப்படும் உள்ளடக்கம் பிரிவு 20ன் துணைப் பிரிவு 2 உட்பட 1995ம் ஆண்டு CTN சட்ட விதிகளுக்கு இணங்க வேண்டும் என்றும் அமைச்சகம் தெரிவித்துள்ளது. மேலும், கடுமையான குற்றங்கள், பயங்கரவாத குற்றச்சாட்டுகள் உள்ளவர்கள் மற்றும் அமைப்புகளைச் சேர்ந்தவர்கள் உட்பட அத்தகைய பின்னணியில் உள்ள நபர்களைப் பற்றிய அறிக்கைகள், குறிப்புகள் மற்றும் பார்வைகள், நிகழ்ச்சி நிரல்களுக்கு எந்தவொரு தளத்தையும் வழங்குவதைத் தவிர்க்குமாறு தொலைக்காட்சி சேனல்களுக்கு அறிவுறுத்தப்பட்டுள்ளது.
