திருமலை, ஆந்திர மாநிலம், அல்லூரி சீதாராமராஜூ மாவட்டத்தில் இருக்கும் ராஜவோம்மங்கி அடுத்த லபார்ட்டி கிராமத்தில் வசிக்கும் தம்பதி துர்காராவ்- ரம்யாலட்சுமி. இந்த தம்பதிகளுக்கு இரண்டு குழந்தைகள் உள்ளனர். இந்நிலையில், துர்க்கா ராவ் ஆன்லைன் கடன் செயலி மூலமாக கடன் வாங்கியுள்ளார். கடனை திருப்பி செலுத்த முடியாததால், அவரை மிரட்டியுள்ளனர்.
பணத்தை செலுத்தவில்லை என்றால், துர்கா ராவின் மனைவியின் ஆபாச புகைப்படங்களை சமூக வலைதளங்களில் பரப்பி விடுவோம் என மிரட்டியுள்ளனர். மேலும், அந்த ஆபாச புகைப்படங்களையும் அவருக்கு வாட்ஸ் அப்பில் அனுப்பியுள்ளனர். இதை பார்த்து துர்க்கா ராவ் மற்றும் அவரது மனைவி இருவரும் அதிர்ச்சி அடைந்தனர்.
இதனால், மனமுடைந்த துர்க்காராவ், ரம்யாலட்சுமி இருவரும் கோதாவரி கரையோரத்தில் இருக்கும் லாட்ஜில் அறை எடுத்து விஷம் குடித்து தற்கொலை செய்து கொண்டனர். இதனால் தாய், தகப்பனை இழந்த இரண்டு குழந்தைகளுக்கும் முதல்வர் ஜெகன் மோகன் தலா ரூ.5 லட்சம் நிதியுதவி அறிவித்து, குழந்தைகளை காப்பகத்தில் சேர்த்து படிக்க வைக்கும்படி உத்தரவிட்டு இருக்கிறார்.
