நடப்பு ஐபிஎல் சீசனின் முதல் பாதி முடிவடைந்த நிலையில், புள்ளிப்பட்டியலில் நடப்பு சாம்பியன் குஜராத் டைட்டன்ஸ் அணி 2ஆவது இடத்திலும், சென்னை சூப்பர் கிங்ஸ் அணி முதலிடத்திலும் உள்ளன.
ஐபிஎல் 2023ஆம் ஆண்டு தொடர் மார்ச் 31ஆம் தேதி முதல் மே 28ஆம் தேதி வரை நடைபெறுகிறது. இதில் 10 அணிகளும் கோப்பையை வெல்லும் முனைப்பில் தீவிரமாக விளையாடிவருகின்றன. இந்த சீசனில் 10 அணிகளும் விர்ச்சுவலாக 2 பிரிவுகளாக பிரிக்கப்பட்டுள்ளன. முதல் 4 இடங்களை பிடிக்கும் அணி பிளே ஆப் சுற்றுக்கு தகுதி பெறும். இந்தநிலையில் அகமதாபாத் மைதானத்தில் நடைபெற்ற 35ஆவது லீக் போட்டியில் மும்பை இந்தியன்ஸ் அணியும், குஜராத் டைட்டன்ஸ் அணியும் மோதின. இதில், டாஸ் வென்ற மும்பை இந்தியன்ஸ் அணி பந்து வீசுவதாக அறிவித்தது.
அதன்படி முதலில் ஆடிய குஜராத் டைட்டன்ஸ் அணியில் சகா 4 ரன்களில் வெளியேறினாஅர். ஹர்திக் பாண்டியாவும் 13 ரன்களில் ஆட்டமிழந்தார். ஒருபுறம் நின்னு நிதானமாக ஆடிய சுப்மன் கில் 34 பந்துகளில் ஒரு சிக்ஸர், 7 பவுண்டரிகள் உள்பட 56 ரன்கள் குவித்து ஆட்டமிழந்தார்.அதன்பிறகு வந்த விஜய் சங்கர் 19 ரன்களில் வெளியேறினார். அப்போது குஜராத் டைட்டன்ஸ் அணி 12.2 ஓவர்களில் 4 விக்கெட் இழப்பிற்கு 101 ரன்கள் வரையில் எடுத்திருந்தது. பின்னர் வந்த டேவிட் மில்லர் மற்றும் அபினவ் மனோகர் ஆகியோர் தங்களது பங்கிற்கு கடைசியில் அதிரடி காட்ட ஸ்கோர் மளமளவென உயர்ந்தது. அபினவ் மனோகர் 42 ரன்களில் ஆட்டமிழக்க, மில்லர் 46 ரன்களில் ஆட்டமிழந்தார்.
கடைசியாக வந்த ராகுல் திவேதியாக 3 சிக்ஸர்கள் விளாச குஜராத் டைட்டன்ஸ் அணியின் ஸ்கோர் 200 ரன்களை கடந்தது. இறுதியாக குஜராத் டைட்டன்ஸ் அணி 20 ஓவர்கள் முடிவில் 6 விக்கெட் இழப்பிற்கு 207 ரன்கள் குவித்தது.இதைத் தொடர்ந்து கடின இலக்கை துரத்திய மும்பை இந்தியன்ஸ் அணிக்கு ரோகித் சர்மா 2, இஷான் கிஷான் 13, திலக் வர்மா 2 என்று வரிசையாக ஆட்டமிழந்தனர். 7.6 ஓவரில் 3 விக்கெட் இழந்து 45 ரன்கள் எடுத்து மும்பை இந்தியன்ஸ் அணி தடுமாறியது. கேமரூன் க்ரீன் 33 ரன்களில் வெளியேற, அடுத்து வந்த டிம் டேவிட் டக் அவுட்டில் ஆட்டமிழந்தார். நேஹல் வதேரா மட்டும் நிலைத்து நின்று ஆடி 40 ரன்கள் சேர்த்தார். மற்ற வீரர்களான் பியூஷ் சாவ்லா 18 ரன்னிலும், அர்ஜூன் டெண்டுல்கர் 13 ரன்னிலும் ஆட்டமிழந்தனர். இறுதியாக மும்பை இந்தியன்ஸ் அணி 20 ஓவர்களில் 9 விக்கெட் இழந்து 152 ரன்கள் மட்டுமே எடுத்து 55 ரன்களில் தோல்வியை தழுவியது. இந்த தோல்வியின் மூலமாக மும்பை இந்தியன்ஸ் 7 போட்டிகளில் விளையாடி 3 போட்டிகளில் வெற்றி பெற்று புள்ளிப்பட்டியலில் 7ஆவது இடத்தில் உள்ளது.
மும்பையை 55 ரன்கள் வித்தியாசத்தில் வீழ்த்தியதன் மூலமாக குஜராத் டைட்டன்ஸ் அணி புள்ளிப்பட்டியலில் 2ஆவது இடத்திற்கு சென்றுள்ளது. புள்ளிப்பட்டியலில் சென்னை சூப்பர் கிங்ஸ் 5 வெற்றிகளுடன் முதலிடத்தில் உள்ளது. அதாவது தற்போது ஐபிஎல் 2023 கிரிக்கெட் திருவிழாவின் 16ஆவது சீசனின் முதல் பாதி போட்டிகள் முடிவடைந்த நிலையில், தற்போதைய நிலவர படி 7 போட்டிகளில் விளையாடியுள்ள சென்னை அணி 5 வெற்றிகளுடன் முதலிடத்தும், இதேபோல் 5 போட்டிகளில் வெற்றி பெற்றிருந்தாலும் குஜராத் அணி ரன்ரேட் அடிப்படையில் 2வது இடத்திலும் உள்ளன.
அடுத்தடுத்த இடங்களில் ஆர்சிபி, லக்னோ அணிகள் உள்ளன. தற்போது வரையில் ஒவ்வொரு அணியும் 7 போட்டிகள் விளையாடியுள்ளன. இதே போன்று ஒவ்வொரு அணிக்கும் இன்னும் 7 போட்டிகள் உள்ளன. எந்தெந்த அணிகள் எல்லாம் புள்ளிப்பட்டியலில் கடைசி இடங்களில் உள்ளனவோ அந்தந்த அணிகள் எல்லாம் இனி வரும் போட்டிகளில் வெற்றி பெற்றாக வேண்டும். இல்லையென்றால், இந்த தொடரிலிருந்து வெளியேறும் நிலை ஏற்படும் என்பது குறிப்பிடத்தக்கது.
