சென்னை சேப்பாக்கம் மைதானத்தில் நடைபெறும் ஐபிஎல் பிளே ஆஃப் போட்டிகளை காண மெட்ரோவில் வரும் பயணிகள் பயணச்சீட்டு எடுக்க வேண்டும் என்று மெட்ரோ நிர்வாகம் அறிவித்துள்ளது.
நடப்பாண்டு நடைபெற்று வரும் ஐபிஎல் தொடரில் சென்னையில் நடைபெறும் போட்டிகளை காண வரும் ரசிகர்கள் ஐபிஎல் டிக்கெட்டில் உள்ள கியூஆர் கோடை பயன்படுத்தி மெட்ரோவில் எந்த வித கட்டணமும் இல்லாமல் பயணிக்கும் வசதி ஏற்படுத்தப்பட்டிருந்தது.சென்னை சூப்பர் கிங்ஸ் நிர்வாகத்துடன் இணைந்து மெட்ரோ நிர்வாகம் இந்த சலுகையை ரசிகர்களுக்கு வழங்கியுள்ளது. ஆனால், மே 23 மற்றும் 24-ம் தேதிகளில் நடைபெறவுள்ள பிளே ஆஃப் போட்டிகளை இந்திய கிரிக்கெட் வாரியம் நடத்த உள்ளது. எனவே அந்த தேதிகளில் சென்னை, சேப்பாக்கம் மைதானத்தில் நடைபெறவுள்ள ஐபிஎல் பிளேஆஃப் போட்டிகளை காண வரும் கிரிக்கெட் ரசிகர்கள், மற்றும் மெட்ரோ பயணிகள் மெட்ரோ ரயிலில் பயணிப்பதற்கு வழக்கமான பயணச்சீட்டுகளை பெற்றுகொள்ளுமாறு சென்னை மெட்ரோ ரயில் நிர்வாகம் அறிவித்துள்ளது.
மேலும், சென்னையில் போட்டி நடைபெறும் நாட்களில் கிரிக்கெட் ரசிகர்களுக்காக இரவு 1 மணி வரை மெட்ரோ ரயில்கள் இயக்கப்படும் என ரயில் நிர்வாகம் தெரிவித்துள்ளது. ஆனால், இரவு 11 மணிக்கு மேல் டிக்கெட் கவுண்டர்கள் செயல்படாது என்பதால், மெட்ரோ வாட்ஸ்அப் எண் அல்லது மெட்ரோ செயலியில் டிக்கெட்டுகளை பெற்றுக் கொள்ள ரசிகர்களுக்கு அறிவுறுத்தப்பட்டுள்ளது. இன்று சென்னை சூப்பர் கிங்ஸ் – குஜராத் டைட்டன்ஸ் அணிகள் முதல் பிளே ஆஃப் சுற்றிலும், மற்றும் மே 24-ம் தேதி மும்பை இந்தியன்ஸ் – லக்னோ சூப்பர் ஜயண்ட்ஸ் அணிகள் எலிமினேட்டர் சுற்றிலும் மோதவுள்ளன.
