பாகிஸ்தான் முன்னாள் பிரதமர் இம்ரான் கானுக்கு 3 ஆண்டுகள் சிறை தண்டனை விதிக்கப்பட்டுள்ளது. இதையடுத்து அவர் அதிரடியாக கைது செய்யப்பட்டுள்ளார். இந்தப் பதவியை வகித்த ஒரு பிரதமரோ அல்லது ஒரு தலைவரோ சிறைத் தண்டனைக்கு உட்படுத்தப்படுவது இந்நாட்டில் முதல் முறையல்ல. பிரதமர்கள் சிறைக்குச் செல்லும் நீண்ட வரலாறு உள்ளது. இந்தியாவின் அண்டை நாடான எந்தெந்த தலைவர்கள் பிரதமர் பதவியை வகிக்கும் போது அல்லது அதற்குப் பிறகு சிறைக்குச் சென்றார்கள் என்பதை இந்தப் பதிவில் பார்க்கலாம்.
பாகிஸ்தானின் பிரதமர் பதவி என்பது எளிதல்ல. இப்படி ஒரு பதவியில் அமர்ந்து சிறை வாசம் அனுபவித்துள்ளவர்கள் பலர் இருக்கின்றனர். சிறைக்குச் சென்ற சில பிரபலமான தலைவர்களைப் பற்றி பேசுகையில், பெனாசிர் பூட்டோ பலமுறை கைது செய்யப்பட்டார். இதேபோல் 1974ல் சுல்பிகர் அலி பூட்டோவும், 1999ல் நவாஸ் ஷெரீப் கைது செய்யப்பட்டனர்.
பாகிஸ்தானின் முன்னாள் பிரதமர் ஹுசைன் ஷஹீத் சுஹ்ரவர்தி செப்டம்பர் 1956 முதல் அக்டோபர் 1957 வரை பாகிஸ்தானின் பிரதமராக இருந்தார். அவர் ஜெனரல் அயூப் கானின் இராணுவ சதிக்கு ஆதரவளிக்க மறுத்துவிட்டார். தேச விரோத செயல்களில் ஈடுபட்ட குற்றச்சாட்டில் விசாரணையின்றி அவர் சிறைக்கு அனுப்பப்பட்டார்.
ஆகஸ்ட் 1973 முதல் ஜூலை 1977 வரை பாகிஸ்தானின் பிரதமராக இருந்த சுல்பிகர் அலி பூட்டோ சிறை தண்டனை அனுபவித்துள்ளார். 1974 ஆம் ஆண்டு அரசியல் எதிரியைக் கொல்ல சதி செய்ததாக அவர் மீது குற்றம் சாட்டப்பட்டது. இந்த வழக்கில், 1977ஆம் ஆண்டு அவர் கைது செய்யப்பட்டார். சில நாட்கள் சட்டச் சண்டைக்குப் பிறகு, ஏப்ரல் 4, 1979 அன்று தூக்கிலிடப்பட்டார்.
பாகிஸ்தானின் முதல் பெண் பிரதமர் பெனாசிர் பூட்டோவும் சிறை சென்றுள்ளார். பூட்டோ இரண்டு முறை பாகிஸ்தானின் பிரதமராக இருந்துள்ளார்.
பாகிஸ்தான் பிரதமராக இருந்த நவாஸ் ஷெரீப், பர்வேஸ் முஷாரப் ஆட்சியில் 2007ஆம் ஆண்டு 10 ஆண்டுகள் நாடு கடத்தப்பட்டார். முன்கூட்டியே திரும்பியதற்காக கைது செய்யப்பட்டார். 2018இல் ஊழல் குற்றச்சாட்டில் நவாஸ் ஷெரீப் மற்றும் மகள் மரியம் ஆகியோருக்கு 10 ஆண்டுகள் சிறை தண்டனை விதிக்கப்பட்டது. 2018 டிசம்பரில், பாகிஸ்தானில் அதிக காலம் பிரதமராக இருந்த நவாஸ் ஷெரீப், அல்-அஜிசியா ஸ்டீல் மில் வழக்கில் சிறை தண்டனை விதிக்கப்பட்டார்.
2008இல் யூசுப் ரசா கிலானி பாகிஸ்தானின் பல அரசியல் கட்சிகளின் கூட்டணி அரசாங்கத்தின் பிரதமராக இருந்தார். ஊழல் வழக்கில் அவருக்கு எதிராக கைது வாரண்ட் பிறப்பிக்கப்பட்டது. போலி நிறுவனங்களின் பெயரில் பணப் பரிவர்த்தனை செய்ததாக அவர் மீது குற்றச்சாட்டு எழுந்தது. இதனால், அவர் சிறையில் அடைக்கப்பட்டார்.
PML-N தலைவர் ஷாஹித் ககான் அப்பாசி ஜனவரி 2017 முதல் மே 2018 வரை பாகிஸ்தானின் பிரதமராக இருந்தார். எல்என்ஜி வழக்கில் ஊழல் செய்த குற்றச்சாட்டின் பேரில் ஷாஹித் ககான் அப்பாசி தேசிய பொறுப்புக்கூறல் பணியகத்தால் (என்ஏபி) கைது செய்யப்பட்டார்.
பணமோசடி வழக்கில் லாகூர் உயர்நீதிமன்றம் ஜாமீனை நிராகரித்ததை அடுத்து, பாகிஸ்தானின் தற்போதைய பிரதமர் ஷெபாஸ் ஷெரீப் 28 செப்டம்பர் 2020 அன்று NAB ஆல் கைது செய்யப்பட்டார். சுமார் 7 மாதங்களுக்குப் பிறகு, அவர் லாகூரில் உள்ள கோட் லக்பத் மத்திய சிறையில் இருந்து விடுவிக்கப்பட்டார்.
பாகிஸ்தானின் 22-வது பிரதமர் இம்ரான் கான் ஆகஸ்ட் 5, 2023 அன்று சிறைக்குச் சென்றார். பிரபல தோஷகானா வழக்கில் விதிகளை மீறியதற்காக அவர் சிறையில் அடைக்கப்பட்டுள்ளார். முன்னதாக மே 2023 இல், அல்-காதிர் பல்கலைக்கழக அறக்கட்டளை வழக்கில் ஊழல் குற்றச்சாட்டில் NAB உத்தரவின் பேரில் பாக் ரேஞ்சர்களால் கைது செய்யப்பட்டார். பாகிஸ்தான் கிரிக்கெட் அணியின் கேப்டனாக இருந்து அரசியலில் நுழைந்தவர் இம்ரான். இவரது தலைமையில் அந்த அணி உலககோப்பை வென்றுள்ளது. இதனால் நாடு முழுவதும் இவருக்கு அதிகமான ரசிகர்கள் உள்ளனர். இதற்கிடையே தான் இம்ரான் கான் தெஹ்ரிக் இ இன்சாஃப் கட்சியை தொடங்கி அரசியல் பிரவேசம் செய்து வெற்றி பெற்று பிரதமர் ஆனார் என்பது குறிப்பிடத்தக்கது.
