மக்களவை தேர்தலுக்கான வேட்பு மனு தாக்கல் நாளை தொடங்க உள்ள நிலையில், அரசியல் கட்சிகள் கூட்டணிகளை இறுதி செய்யவும் தொகுதிகளை பகிர்ந்து கொண்டு வேட்பாளர்களை அறிவிக்கவும் தீவிரம் காட்டி வருகின்றன. திமுக கூட்டணியில் காங்கிரஸ் கட்சிக்கு 9 தொகுதிகள், விடுதலைச் சிறுத்தைகள், மாா்க்சிஸ்ட் கம்யூனிஸ்ட், இந்திய கம்யூனிஸ்ட் கட்சிகளுக்கு தலா 2 தொகுதிகள், மதிமுக, இந்திய யூனியன் முஸ்லிம் லீக், கொங்கு நாடு மக்கள் தேசிய கட்சி ஆகிய கட்சிகளுக்கு தலா ஒரு தொகுதி ஒதுக்கப்பட்டுள்ளன. இதன்மூலம் திமுக 21 தொகுதிகளில் நேரடியாக போட்டியிடுவது உறுதியாகி உள்ளது.
அதே நேரத்தில் பல சுற்று பேச்சுவார்த்தைக்கு பின்னரும் இதுவரை கூட்டணியை இறுதி செய்ய முடியாமல் அதிமுக தவித்து வந்தது. அதிமுக கூட்டணி பா.ம.க மற்றும் தேமுதிகவுடன் பேச்சுவார்த்தை நடத்தி வந்த நிலையில், நேற்றைய தினம் பாமக, பாஜக கூட்டணியில் இணைந்தது. இதற்கிடையே, தேமுதிக, அதிமுகவில் இணைவது உறுதியாகியுள்ளது.
இந்நிலையில், மக்களவை தேர்தலில் அதிமுகவுக்கு ஆதரவு அளிப்பதாக மூவேந்தர் புலிப்படை அமைப்பு, மாவீரன் சுந்தரலிங்கனார் மக்கள் இயக்கம் நேற்றிரவு அறிவித்துள்ளன. எடப்பாடி பழனிசாமியை நேரில் சந்தித்து இரு அமைப்பின் தலைவர்களும் ஆதரவு கடிதத்தை வழங்கினர். தற்போது அதிமுக கூட்டணியில் புதிய தமிழகம், புரட்சி பாரதம், எஸ்.டி.பி.ஐ., அகில இந்திய ஃபார்வாட் பிளாக் உள்ளிட்ட கட்சிகள் இடம்பெற்றுள்ளன. தேமுதிகவும் இக்கூட்டணியில் இணைய வாய்ப்புள்ளது குறிப்பிடத்தக்கது.
