சேலம் மாவட்டம், பெத்தநாயக்கன்பாளையம் அருகே உள்ள தென்னம்பிள்ளையூர் கிராமத்தை சேர்ந்தவர் 25 வயதான பிரசாந்த். இவரும் அதே பகுதியை சேர்ந்த 18 வயது பெண் ஒருவரும் காதலித்து வந்துள்ளனர். ஒரு கட்டத்தில், இவர்களின் காதல் குறித்து, இவர்களின் குடும்பத்தினருக்கு தெரியவந்துள்ளது. இதனால் இரு தரப்பினருக்கிடையே தகராறு ஏற்பட்ட நிலையில், அது கைக்கலப்பாக மாறியுள்ளது. தகராறு முற்றிய நிலையில், பிரசாந்தின் தந்தை குணசேகரனை அந்தப் பெண்ணின் குடும்பத்தினர் கடுமையாக தாக்கியுள்ளனர்.
இதில் குணசேகரன் பலத்த காயமடைந்த நிலையில், அவரை மீட்டு சிகிச்சைக்காக அரசு மருத்துவமனையில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வந்த நிலையில், சிகிச்சை பலனின்றி அவர் பரிதாபமாக உயிரிழந்தார். இதுகுறித்து தகவல் அறிந்த போலீசார், இளம் பெண்ணின் உறவினர்கள் முருகேசன், சிவக்குமார் ஆகியோரை கைது செய்துள்ளனர். இந்த சம்பவம் அப்பகுதியில் பெரும் அதிர்ச்சியை ஏற்படுத்தி உள்ளது.
