திருவாரூர் மாவட்டம் சேந்தங்குடி பகுதியை சேர்ந்தவர் ராமச்சந்திரன். பொறியியல் பட்டதாரியான இவர், ஆவின் நிறுவனம் ஒன்றில் தற்காலிக ஊழியராக வேலை செய்து வந்துள்ளார். இந்நிலையில், இவர் வாஞ்சியூர் என்ற இடத்தில், ரத்த வெள்ளத்தில் சடலமாக கிடப்பதாக அப்பகுதியினர் போலீசாருக்கு தகவல் தெரிவித்தனர். தகவலின் பேரில், சம்பவ இடத்திற்கு விரைந்து வந்த போலீசார், உடலை மீட்டு பிரேத பரிசோதனைக்காக திருவாரூர் அரசு மருத்துவமனைக்கு அனுப்பி வைத்தனர்.
விபத்தில் இவர் உயிரிழந்ததாக கூறப்பட்ட நிலையில், மருத்துவர்கள் அவரது தலையில் வெட்டு காயம் இருப்பதாக கூறியுள்ளனர். இதனால் சந்தேக மரணம் என்று வழக்குப்பதிவு செய்த போலீசார், தீவிர விசாரணை நடத்தினர். விசாரணையில், நாகை மாவட்டம் ஆந்தங்குடியை சேர்ந்த மருத்துவக்கல்லுரி மாணவியை ராமசந்திரன் காதலித்ததால், மாணவியின் குடும்பத்தினர் இவர்கள் காதலுக்கு கடும் எதிர்ப்பு தெரிவித்தனர். மேலும், மாணவியின் உறவினரான நந்தா, தனது நண்பர்கள் மூன்று பேருடன் சேர்ந்து ராமசந்திரனை வெட்டி கொலை செய்தது தெரியவந்துள்ளது.
இதையடுத்து, இந்த சம்பவம் தொடர்பாக 4 பேரை கைது செய்த போலீசார், வேறு யாருக்கெல்லாம் கொலையில் தொடர்பு இருக்கிறது என தீவிர விசாரணை மேற்கொண்டு வருகின்றனர்.
