தவறான தகவல்களை மக்களிடத்தில் பரப்பியதாக பிரபல செய்தி சேனல் மீது வழக்குப்பதிவு செய்யப்பட்டுள்ளது.
சிறுபான்மையினருக்கான மாநில அரசின் வணிக வாகன மானியத் திட்டம் குறித்து தவறான தகவல்களைப் பரப்பிய குற்றச்சாட்டின் பேரில் பிரபல இந்தி செய்தி சேனல் மற்றும் அதன் ஆலோசனை ஆசிரியர் மீது கர்நாடக காவல்துறை வழக்குப்பதிவு செய்துள்ளது.
Aaj Tak செய்தி சேனல் மற்றும் அதன் ஆலோசனை ஆசிரியருக்கும் எதிராகவும் இந்திய தண்டனைச் சட்டத்தின் பிரிவுகள் 505 மற்றும் 153 ஏ ஆகியவற்றின் கீழ் வழக்குப்பதிவு செய்யப்பட்டுள்ளது. கர்நாடக சிறுபான்மையினர் மேம்பாட்டு கழகத்தின் (கேஎம்டிசி) உதவி நிர்வாகி சிவக்குமார் அளித்த புகாரின் பேரில் சேஷாத்திரிபுரம் காவல் நிலைய போலீசார் வழக்குப்பதிவு செய்துள்ளனர்.
மாநகராட்சி திட்டம் குறித்து தவறான செய்திகளை பரப்பி, மாநிலத்தில் மத நல்லிணக்கத்தை சீர்குலைக்க முயற்சிப்பதாக புகார்தாரர் குற்றம்சாட்டியுள்ளனர். இந்த வழக்குப்பதிவு குறித்து Aaj Tak செய்தி சேனலின் கன்சல்டிங் எடிட்டர் சுதிர் சவுத்ரி கூறுகையில், ”இந்த வழக்கை எதிர்த்து நீதிமன்றத்தில் போராடத் தயாராக இருப்பதாகக் கூறினார். காங்கிரஸ் அரசு என் மீது எப்ஐஆர் போட்டது பற்றிய தகவல் கிடைத்தது. அதுவும் ஜாமீனில் வெளிவர முடியாத பிரிவுகளில் வழக்குப்பதிவு செய்யப்பட்டுள்ளது. இதனை எதிர்த்து நீதிமன்றத்தில் போராடுவேன்” என்று தெரிவித்துள்ளார்.
