கேரள மாநிலத்தின் பெயரை ‘கேரளம்’ என மாற்ற மத்திய அரசை வலியுறுத்தும் தீர்மானம் ஒருமனதாக நிறைவேற்றப்பட்டது.
முதலமைச்சர் பினராயி விஜயன் தலைமையிலான இடதுசாரிகள் கேரளாவை ஆட்சி செய்து வருகின்றனர். இந்நிலையில், மாநிலத்தின் பெயரான கேரளா என்பதை ‘கேரளம்’ என பெயர் மாற்ற அரசு முடிவு செய்துள்ளது. மேலும், அரசியல் சாசனம் மற்றும் அரசு ஆவணங்களில் மாநிலத்தின் பெயர் ‘கேரளம்’ என மாற்றம் செய்ய மாநில அரசு விரும்பியது. இதற்காக கேரளாவின் பெயரை மாற்றம் செய்வதற்கான தீர்மானத்தை சட்டப்பேரவையில், முதலமைச்சர் பினராயி விஜயன் கொண்டு வந்தார்.
இந்திய அரசியலமைப்புச் சட்டத்தின் 8-வது அட்டவணையில் உள்ள அனைத்து மொழிகளிலும் மாநிலத்தின் பெயரை ‘கேரளம்’ என்று மாற்ற வேண்டும் என்று மத்திய அரசை வலியுறுத்தி தீர்மானம் கொண்டு வரப்பட்டது. மாநில பெயர் மாற்ற தீர்மானத்தின் மீது விவாதம் நடைபெற்று இன்றே சட்டப்பேரவையில் ஒரு மனதாக நிறைவேறியது.
முன்னதாக நேற்று பொது சிவில் சட்டத்திற்கு எதிராக கேரள மாநில அரசு சட்டப்பேரவையில் தீர்மானம் கொண்டு வந்தது. பொது சிவில் சட்ட முன்வடிவை மத்திய அரசு திரும்பப் பெற வேண்டும் என்று வலியுறுத்தி தாக்கல் செய்யப்பட்ட தீர்மானம், ஒருமனதாக நிறைவேற்றப்பட்டது. அப்போது கேரள சட்டமன்ற கூட்டத்தை தமிழ்நாடு தகவல் தொழில்நுட்பத்துறை அமைச்சர் பழனிவேல் தியாகராஜன் பார்வையிட்டார்.
