தினசரி வேலை நேரத்தை 12 மணி நேரமாக அதிகரித்தும், வார விடுமுறையை 3 நாட்களாக உயர்த்தவும் மத்திய அரசு திட்டமிட்டுள்ளதாக செய்திகள் வெளியாகியுள்ளது.
நாட்டில் தற்போது தினசரி 8 மணி நேர வேலையும் வாரத்திற்கு சனி, ஞாயிறு என இரண்டு நாள் விடுமுறையும் வழங்கப்பட்டு வருகிறது. இம்முறையை மாற்றிட மத்திய அரசு திட்டமிட்டு வருவதாக கூறப்படுகிறது. இனி வாரத்திற்கு 3 நாட்கள் விடுமுறை கொள்கையை அறிமுகப்படுத்துவதற்கு மத்திய பாஜக அரசு திட்டமிட்டுள்ளதாக தகவல் வெளியாகியுள்ளது.
இந்த புதிய நடைமுறையின்படி, ஊழியர்கள் ஒரு நாளைக்கு பத்து முதல் 12 மணி நேரம் வரை என 4 நாட்களுக்கு வேலை செய்ய வேண்டும். அப்படி செய்தால் மீதமுள்ள மூன்று நாட்கள் விடுமுறை கிடைக்கும். மக்களவைத் தேர்தலுக்கு முன்பாக இடைக்கால பட்ஜெட் நாளை தாக்கல் செய்யப்பட உள்ள நிலையில், இது தொடர்பான அறிவிப்புகள் பட்ஜெட்டில் வெளியாக வாய்ப்புள்ளது.
காலம் காலமாக எட்டு மணி நேர வேலைக்கு பழகியுள்ள இந்திய தொழிலாளர்கள் இதனை எப்படி எதிர்கொள்வார்கள் என்ற எதிர்பார்ப்பு எழுந்துள்ளது. இந்த முறைக்கு நாட்டில் உள்ள தொழிற்சங்கங்கள், தொழிலாளர்கள் வரவேற்பு கொடுப்பார்களா? அல்லது இதற்கு எதிர்ப்புகள் கிளம்புமா? என்பது மத்திய அரசின் அறிவிப்புக்கு பின்னர்தான் தெரிய வரும்.
