பஹல்காமில் கடந்த செவ்வாய் கிழமை நடந்த பயங்கரவாத தாக்குதலில் 26 சுற்றுலா பயணிகள் கொல்லப்பட்டனர். இந்த சம்பவம் நாடு முழுவதும் பெரும் அதிர்வலைகளை ஏற்படுத்தி உள்ளது. தாக்குதலை நடத்திய பயங்கரவாதிகளின் ஓவியங்களை ஜம்மு காஷ்மீர் காவல்துறை புதன்கிழமை வெளியிட்டது. இந்த நிலையில், இந்த கொடூர தாக்குதலில் இருந்து தப்பியவர்கள் அளித்த விவரங்களின் அடிப்படையில் அவர்களின் அடையாளங்களை காவல்துறையினர் வெளியிட்டனர்.
4 பயங்கரவாதிகள் இந்த தாக்குதலில் ஈடுபட்டதாக பாதுகாப்பு படையினர் கூறியுள்ளனர். இந்த 4 பேரில், இருவர் பாகிஸ்தானிலிருந்து ஊடுருவியவர்கள் என்றும், மேலும் இருவர் அவர்களுக்கு உதவியதாகக் கூறப்படும் உள்ளூர் காஷ்மீர் மக்கள் என்றும் கூறப்படுகிறது..
4 பயங்கரவாதிகள் யார்?
இந்த 4 பயங்கரவாதிகளையும் ஜம்மு காஷ்மீர் காவல்துறையினர் அடையாளம் கண்டுள்ளனர். அதன்படி, அலி பாய் என்கிற தல்ஹா (பாகிஸ்தானியர்), ஆசிப் ஃபௌஜி (பாகிஸ்தானியர்), அடில் ஹுசைன் தோக்கர் (அனந்த்நாக்கில் வசிப்பவர்) மற்றும் அஹ்சன் (புல்வாமாவில் வசிப்பவர்) ஆகியோர் தாக்குதல் நடத்தியதாக காவல்துறையினர் தெரிவிக்கின்றனர்.
பஹல்காம் தாக்குதலுக்குப் பின்னால் உள்ள பாகிஸ்தான் பயங்கரவாதிகளான ஹஷிம் மூசா மற்றும் அலி தல்ஹா யார்?
ஹாஷிம் மூசா:
பஹல்காமில் நடந்த தாக்குதலின் முக்கிய குற்றவாளிகளில் ஒருவரான பாகிஸ்தானியரான ஹாஷிம் மூசா என்கிற சுலைமான், கடந்த ஒரு வருடமாக ஜம்மு-காஷ்மீரில் இருந்து வருகிறார். அவர் பாதுகாப்புப் படையினர் மற்றும் உள்ளூர்வாசிகள் அல்லாதவர்கள் மீது குறைந்தது 3 தாக்குதல்களில் ஈடுபட்டிருக்கலாம் என்று இதுகுறித்து நன்கு அறிந்த NIA அதிகாரிகள் தெரிவித்தனர்.
லஷ்கர்-இ-தொய்பாவைத் தவிர, பள்ளத்தாக்கில் செயல்படும் பாகிஸ்தான் ஆதரவு பெற்ற பிற பயங்கரவாத குழுக்களுடன் மூசா இணைந்து பணியாற்றக்கூடும் என்று சந்தேகிக்கப்படுகிறது.
அலி தல்ஹா:
அலி தல்ஹா காஷ்மீர் பள்ளத்தாக்கில் கிட்டத்தட்ட இரண்டு ஆண்டுகளாக தீவிரமாக செயல்பட்டு வருகிறார். மூசாவுக்குப் பிறகு அலி பள்ளத்தாக்குக்கு வந்து ஸ்ரீநகர் நகரின் புறநகரில் உள்ள டச்சிகாம் காடுகளில் தீவிரமாக இருந்ததாகவும் தகவல்கள் தெரிவிக்கின்றன.
தாக்குதல் நடத்தியவர்கள், குறிப்பாக மூசா பற்றி மேலும் அறிய உள்ளூர்வாசிகள் மற்றும் நிலத்தடி தொழிலாளர்கள் சிலர் ஏற்கனவே விசாரிக்கப்பட்டு வருவதாக மற்றொரு அதிகாரி கூறினார்.
அடில் தோக்கர் யார்?
ஜம்மு-காஷ்மீரின் அனந்த்நாக்கைச் சேர்ந்த அடில் தோக்கர், 2018 ஆம் ஆண்டு பாகிஸ்தானுக்குள் ஊடுருவி, கடந்த ஆண்டு யூனியன் பிரதேசத்திற்குத் திரும்பியதாக காவல்துறை அதிகாரிகள் தெரிவித்தனர்.
லஷ்கர்-இ-தொய்பா தவிர, காஷ்மீர் பள்ளத்தாக்கில் செயல்படும் பாகிஸ்தான் ஆதரவு பெற்ற பிற பயங்கரவாதக் குழுக்களுடன் மூசா இணைந்து பணியாற்றி இருக்கலாம் என்று சந்தேகிக்கப்படுகிறது.
“நன்கு பயிற்சி பெற்ற மற்றும் போரில் தேர்ச்சி பெற்ற” பாகிஸ்தான் பயங்கரவாதிகளின் உள்ளூர் வழிகாட்டியாக அடில் தோக்கர் செயல்பட்டு வருவதாக காவல்துறையினர் கூறுகின்றனர்.
ஹாசிம் மூசா மற்றும் பிற பயங்கரவாதிகளைப் பிடிக்க தீவிர முயற்சி
இந்த விசாரணையின் ஒரு பகுதியாக, கடந்த ஒரு வருடமாக எல்லைக்கு அருகில் இருந்து காஷ்மீரின் பல்வேறு மாவட்டங்களுக்கு பாகிஸ்தான் பயங்கரவாதிகளின் பயணத்தை எளிதாக்கிய எல்.இ.டி.யின் நிலத்தடிப் பணியாளர்கள் உட்பட பொதுவான தொடர்புகளை பாதுகாப்பு அமைப்புகள் தேடி வருகின்றன என்றும் அதிகாரிகள் தெரிவித்துள்ளனர்.
காஷ்மீர் பள்ளத்தாக்கில் உள்ள எல்.இ.டி. மற்றும் அதன் பிரதிநிதியான தி ரெசிஸ்டன்ஸ் ஃப்ரண்ட் (டி.ஆர்.எஃப்) உடன் தொடர்பு கொண்டவர்களை அடையாளம் காணும் முயற்சிகளும் மேற்கொள்ளப்பட்டு வருகிறது..
இதனிடையே காவல்துறை 2,000 க்கும் மேற்பட்டவர்களை கைது செய்துள்ளது, பெரும்பாலும் முன்னாள் போராளிகள் என்று கூறப்படுகிறது. முதல்கட்ட விசாரணைக்குப் பிறகு பலர் விடுவிக்கப்பட்டுள்ளனர். பயங்கரவாதிகள் பற்றிய விவரங்களுக்கு ₹20 லட்சம் வெகுமதி அளிக்கப்படும் என்றும் காவல்துறை அறிவித்துள்ளது.
மேலும், ஊடுருவலைத் தடுக்கவும், எல்லைகளில் பாதுகாப்பை அதிகரிக்கவும், பயங்கரவாதக் குழுக்களின் ஆதரவு அமைப்பைக் கண்காணிக்கவும் எடுக்க வேண்டிய பல்வேறு நடவடிக்கைகள் குறித்து விவாதிக்க உள்துறை அமைச்சகம் (MHA), புலனாய்வுப் பிரிவு மற்றும் பிற மத்திய புலனாய்வு அமைப்பு அதிகாரிகள் டெல்லியில் முக்கிய ஆலோசனையில் ஈடுபட்டனர்.
