இண்டிகோ விமானத்தில் சென்ற ஊடகவியலாளர் ஒருவர், அதன் உணவு பகுதியில் கரப்பான் பூச்சிகள் இருப்பதை வீடியோவாக எடுத்து, சமூக வலைத்தளங்களில் பதிவேற்றினார். பலரும் இண்டிகோ விமான நிறுவனத்தின் சுகாதாரத் தரங்கள் குறித்து கண்டனம் எழுப்பிய நிலையில், விமான நிறுவனம் தனது தவறை சரி செய்வதற்கான நடவடிக்கைகளை துரிதமாக மேற்கொண்டுள்ளது.
தருண் சுக்லா என்ற ஊடகவியலாளர், இண்டிகோ விமானத்தில் பயணம் செய்து கொண்டிருந்தார். அப்போது அதன் உணவு பகுதியில் கரப்பான் பூச்சிகள் கூறுவதை கண்டார். அதனை வீடியோவாக எடுத்து தனது சமூக வலைத்தளங்களில் பதிவேற்றி அவர், தனது அதிருப்தியை வெளிப்படுத்தினார். அந்த பதிவை கண்ட பலரும், இண்டிகோ விமான நிறுவனத்தை குறித்து மோசமாக விமர்சித்தனர். சிலர் இனிவரும் காலங்களில் இண்டிகோ விமானங்களில் பயணம் செய்வதை, முழுவதுமாக தவிர்க்கப் போவதாகவும் தெரிவித்திருந்தனர்.
இண்டிகோ நிறுவனம் தருண் சுக்லா இட்ட பதிவுக்கு பதிலாக, தங்களின் ஊழியர்கள் விமானத்தை முழுவதுமாக சுத்தம் செய்வதற்கான ஏற்பாடுகளை மேற்கொண்டதாக தெரிவித்தது. முழு விமானத்திலும் புகையூட்டம் செய்தும், கிருமி நீக்கம் செய்தும் தூய்மை பணிகளை செய்ததாக கூறியுள்ளது. மேலும் பயணிகளுக்கு பாதுகாப்பான, தொந்தரவு இல்லாத பிரயாண அனுபவத்தையே தாங்கள் தர விரும்புவதாகவும், சுகாதாரத்தின் உயர்ந்த தரத்தினை பின்பற்றுவதாகவும் தெரிவித்துள்ளது. மேலும் இந்த சம்பவத்தால் பயணிகளுக்கு ஏற்பட்ட அசௌகரியத்திற்காக வருத்தம் தெரிவித்துள்ளது.
தருண் சுக்லாவின் பதிவை கண்டவுடன் இண்டிகோ நிறுவனம் மேற்கொண்ட நடவடிக்கைகள் பலரிடம் பாராட்டுகளையும் பெற்றது. எனினும் இது போன்ற சுகாதாரம் தொடர்பான பிரச்சனைகளை, இந்த நிறுவனம் எதிர்கொள்வது முதல் முறையல்ல. கடந்த ஆண்டு ஏப்ரல் மாதத்தில், இண்டிகோ விமானத்தில் உணவு அருந்தி கொண்டிருந்தபோது, மேஜையில் கரப்பான் பூச்சி ஊறுவதை பயணி ஒருவர் வீடியோவாக பகிர்ந்திருந்தார். இதேபோல் கடந்த அக்டோபரிலும் வேறொரு பயணி, பாட்னாவில் இருந்து டெல்லிக்கு சென்ற போது கரப்பான் பூச்சி தொடர்பான வீடியோ ஒன்றை பகிர்ந்திருந்தது குறிப்பிடத்தக்கது. இந்த சம்பவங்கள் இண்டிகோ நிறுவனத்தின் சுகாதாரத் தரத்தை கேள்விக்கு உட்படுத்துகிறது.
