சண்டிகர் பல்கலைக்கழகத்தின் மாணவிகள் 60 பேரின் குளியல் வீடியோக்கள் இணையதளத்தில் வெளியானதால், சில மாணவிகள் தற்கொலைக்கு முயன்ற சம்பவம் பெரும் பரபரப்பை ஏற்படுத்தியுள்ளது.
பஞ்சாப் மாநிலம் சண்டிகர் பல்கலைக்கழகத்தில் எம்பிஏ முதலாம் ஆண்டு மாணவி ஒருவர், விடுதியில் தங்கி படிக்கும் 60 மாணவிகளின் குளியல் வீடியோக்களை சிம்லாவில் உள்ள அவரது காதலனுக்கு அனுப்பியுள்ளார். இதையடுத்து, அந்த வீடியோக்கள் இணையதளங்களில் வெளியானதால், அதிர்ச்சியடைந்த மாணவிகள் இரவு பல்கலைக்கழக விடுதி வளாகத்தில் போராட்டத்தில் குதித்தனர். பின்னர், தகவல் அறிந்து சம்பவ இடத்திற்கு வந்த காவல்துறையினர், வீடியோக்களை எடுத்து காதலனுக்கு அனுப்பியதாக கூறப்படும் மாணவியை கைது செய்தனர்.
போராட்டத்தின் போது மாணவி ஒருவர் சுருண்டு விழுந்து மயக்கமடைந்தார். அவரை மீட்ட சக மாணவிகள் மருத்துவமனைக்கு அனுப்பி வைத்தனர். இச்சம்பவம் குறித்து வழக்குப்பதிவு செய்யப்பட்டுள்ளதாகவும் குற்றம்சாட்டப்பட்ட மாணவி கைது செய்யப்பட்டுள்ளதாகவும் காவல்துறை துணை கண்காணிப்பாளர் ரூபிந்தர் கவுர் தெரிவித்துள்ளார். மாணவிகள் அமைதியாக இருக்கும் படி அம்மாநில பள்ளிக்கல்வி அமைச்சர் ஹெச்எஸ் பெயின்ஸ் வேண்டுகோள் விடுத்துள்ளார். மேலும் குற்றவாளிகள் தண்டிக்கப்படுவார்கள் எனவும் அவர் கூறினார். நள்ளிரவில் மாணவிகள் ஒன்று திரண்டு திடீரென போராட்டம் நடத்திய சம்பவம் அப்பகுதியில் பெரும் பரபரப்பை ஏற்படுத்தியுள்ளது.
மேலும், இணையதளத்தில் வீடியோக்கள் கசிந்ததால் மனமுடைந்த சில மாணவிகள், கல்லூரி வளாகத்தில் தற்கொலைக்கு முயன்றுள்ளனர். இதையடுத்து, காவல்துறையினர் விசாரணையை தீவிரப்படுத்தியுள்ளனர்.
