உலகளவில் குரங்கு பாதிப்பு அதிகரித்து வருகிறது. சுமார் 75 நாடுகளில் இருந்து 16,000 க்கும் மேற்பட்டோர் இதுவரை பாதிக்கப்பட்டுள்ளனர்.. இந்தியாவில் கேரளாவில் 3 பேர், டெல்லியில் ஒருவர் என து 4 பேருக்கு பாதிப்பு பதிவாகியுள்ளன.. இருப்பினும், நிதி ஆயோக் உறுப்பினர் டாக்டர் வி.கே.பால் குரங்கு அம்மை நோயைக் கட்டுக்குள் வைத்திருக்க அரசாங்கம் குறிப்பிடத்தக்க நடவடிக்கைகளை எடுத்துள்ளதால், எந்தவித பீதியும் தேவையில்லை என்று தெரிவித்துள்ளார்..
இதுகுறித்து பேசிய வி.கே பால் “ குரங்கு அம்மை குறித்து இந்தியா எச்சரிக்கையுடன் உள்ளது.. இப்போதைக்கு பீதியடைய தேவையில்லை, ஆனால் ஏதேனும் அறிகுறிகள் தென்பட்டால் சரியான நேரத்தில் தெரிவிக்க வேண்டும்.. நிலைமை கட்டுக்குள் உள்ளது, எனவே மக்கள் கவலைப்பட தேவையில்லை.. 15 ஆய்வகங்களைக் கொண்ட போதுமான நோயறிதல் அமைப்பை நாங்கள் உருவாக்கியுள்ளோம்..
நாம் பொறுப்புடன் செயல்பட வேண்டும். எந்தவொரு நபருக்கும் சில அறிகுறிகள் இருந்தால், அவர்கள் நோயறிதலுக்கு வர வேண்டும். நாங்கள் ஏற்கனவே வழிகாட்டுதல்களை வழங்கியுள்ளோம், அதன் மூலம் தனிநபர்கள் முன் வந்து புகாரளித்த பிறகு கவனித்துக் கொள்ளலாம். இந்த வைரஸ் நோயின் அறிகுறிகள் பொதுவாக மற்றொரு நபருடன் தொடர்பு கொண்ட பிறகு தொடங்குகின்றன, அது வெளிப்படாமல் நடக்காது. இது காய்ச்சல், உடல் வலி, ஆற்றல் இழப்பு, பலவீனம், ஆகியவற்றுடன் தொடங்குகிறது, மேலும் சில நாட்களில் உள்ளங்கைகள், கால்கள், பிறப்புறுப்பு உறுப்புகளில் சொறி மற்றும் கொப்புளங்கள் தோன்றும்.
நெருங்கிய தொடர்பில் வரும் அல்லது பாதிக்கப்பட்ட நபரின் படுக்கையைப் பகிர்ந்து கொள்ளும் எவரும் ஆபத்தில் உள்ளனர், மேலும் இந்த தொற்றுநோயையும் பரப்பலாம். நோயாளி இருமல் இருந்தால், பரவும் நீர்த்துளிகளும் நோய்த்தொற்றின் ஆதாரமாக இருக்கலாம்.. குரங்கு காய்ச்சலுக்கு மட்டுமின்றி, அதே போன்ற அறிகுறிகளைக் கொண்ட எந்த நோயும் தீவிரமானதாக இருக்கலாம் என்பதால் சுய மருந்துக்கு செல்ல வேண்டாம். குரங்கு காய்ச்சலுக்கு மரணம் ஏற்படுவது அரிது. புற்றுநோய், எச்.ஐ.வி அல்லது வேறு ஏதேனும் நோயெதிர்ப்பு குறைபாடுள்ள நிலைக்கு சிகிச்சை பெறுபவர்கள் மிகவும் கவனமாக இருக்க வேண்டும்..” என்று தெரிவித்தார்.
கர்ப்பிணிப் பெண்கள் மற்றும் குழந்தைகளுக்கு இந்த நோயின் தாக்கம் குறித்து கேட்டபோது, அவர்கள் பாதிக்கப்பட்ட நபருடன் தொடர்பு கொண்டால், அவர்கள் தீவிரமாக பாதிக்கப்படுவதற்கான வாய்ப்புகள் உள்ளன என்று தெரிவித்தார்.. மேலும் வெளிநாடுகளில் இருந்து வருபவர்களுக்கு நோய்த்தொற்று ஏற்பட வாய்ப்புள்ளதா என்பதை கண்டறிய விமான நிலையங்களில் அமைப்புகள் செயல்படுத்தப்பட்டு வருவதாக அவர் கூறினார்.
