சீரான மின் விநியோகம் வழங்க தொடர்ந்து நடவடிக்கை எடுக்கப்பட்டு வருவதாக அமைச்சர் செந்தில் பாலாஜி தெரிவித்துள்ளார்.
சென்னையில் மின்சாரத்துறை அமைச்சர் செந்தில் பாலாஜி செய்தியாளர்களை சந்தித்தார். அப்போது பேசிய அவர், ”சீரான மின் விநியோகம் வழங்க தொடர்ந்து நடவடிக்கை எடுக்கப்பட்டு வருகிறது. கனமழையால், வெள்ளம் பாதித்த பகுதிகளில் முன்னெச்சரிக்கையாக மின் விநியோகம் நிறுத்தப்பட்டுள்ளது. நீலகிரி மாவட்டத்தில் 12 இடங்களில் மரம் விழுந்ததால் 150 மின்மாற்றிகள் சேதமாகியுள்ளது. இன்று மாலைக்குள் மரங்கள் அகற்றப்பட்டு மின் விநியோகம் சீர் செய்யப்படும். காவிரி கரையோரப் பகுதிகளில் நீர் வடிந்தவுடன் மின் விநியோகம் தொடங்கும். சிறப்பு அதிகாரிகள் நியமிக்கப்பட்டு காவிரி கரையோர மாவட்டங்களில் 24 மணி நேரமும் கண்காணிக்கப்படுகிறது.
சீரான மின்சாரம் விநியோகிக்க 234 தொகுதிகளிலும் சிறப்பு அதிகாரிகள் நியமிக்கப்பட்டுள்ளனர். சென்னை முழுவதும் புதைவட கம்பிகள் பதிக்கும் பணி முடிவடைந்ததும் மீதமுள்ள மாவட்டங்களின் விவரங்கள் மற்றும் மதிப்பீடுகள் தயார் செய்யப்பட்டு விரைவில் அறிவிப்பு வெளியாகும். மேலும், தமிழ்நாட்டில் உள்ள தேசிய நெடுஞ்சாலை – மாநில நெடுஞ்சாலைகளில் மின்சார வாகனங்களுக்கு ஜார்ச்சர் நிலையங்கள் அமைப்பதற்கு முதற்கட்டமாக 100 இடங்கள் தேர்வு செய்யப்பட்டுள்ளது. விரைவில் டெண்டர் கோரப்பட்டு அறிவிப்பு வெளியாகும்”. இவ்வாறு அவர் தெரிவித்தார்.
