ஸ்டுடியோ கிரீன் கே.இ. ஞானவேல் ராஜா மற்றும் யுவி கிரியேஷன்ஸ் வம்சி- பிரமோத் தயாரிப்பில், இயக்குநர் சிவா இயக்கத்தில் சூர்யா நடிப்பில் உருவாகியுள்ள ’கங்குவா’ திரைப்படம் மிகப்பெரிய எதிர்பார்ப்புக்கு மத்தியில் நேற்று திரையரங்குகளில் வெளியானது. சூர்யாவின் கேரியரில் இதுவரை இல்லாத அளவு மிகப்பெரிய பொருட்செலவில் உருவாகியுள்ள இப்படம் தமிழ், தெலுங்கு, கன்னடம், மலையாளம் மற்றும் இந்தி என பல்வேறு மொழிகளில் 3டி தொழில் நுட்பத்திலும் உலகம் முழுவதும் சுமார் 11,500 திரைகளில் வெளியாகியுள்ளது.
இந்நிலையில், இப்படத்தின் முதல் நாள் வசூல் விவரம் குறித்த தகவல் வெளியாகியுள்ளது. அதன்படி, கங்குவா திரைப்படம் முதல் நாளில் உலகம் முழுவதும் ரூ.40 கோடி வரை வசூல் செய்திருப்பதாக கூறப்படுகிறது. தமிழ்நாட்டில் மட்டுமே ரூ.13 கோடி வரை வசூல் செய்திருப்பதாகவும் தகவல் வெளிவந்துள்ளது. இந்திய அளவில் இப்படம் ரூ.26 கோடி வசூல் செய்திருப்பதாக தகவல் கசிந்துள்ளன.
இதன் மூலம் சூர்யாவின் கேரியரில் முதல் நாளில் அதிக வசூல் செய்த படம் என்னும் சிறப்பை கங்குவா அடைந்துள்ளது. இருப்பினும், கங்குவா படத்துக்கு மோசமான விமர்சனங்கள் கிடைத்து வருவதால், இன்று இப்படத்தின் வசூல் பெரியளவில் குறைந்துள்ளது. இந்த படம் உலகளவில் ரூ.2,000 கோடி வசூல் செய்யும் என தயாரிப்பாளர் ஞானவேல் ராஜா கூறியிருந்தார். ஆனால், ஒட்டுமொத்தமாக ரூ.200 கோடி வசூல் செய்யுமா? என்பதே சந்தேகம் தான்.
