Donald Trump: வரலாற்று சிறப்புமிக்க வெற்றிக்குப் பிறகு, அமெரிக்காவின் அடுத்த அதிபராகிறார் குடியரசு கட்சி வேட்பாளரான டொனால்ட் டிரம்ப். இரண்டாவது முறையாக வெள்ளை மாளிகைக்குள் நுழையப் போகிறார். ஜனநாயகக் கட்சி வேட்பாளர் கமலா ஹாரிஸுடனான போட்டி மிக நெருக்கமானதாக இருக்கும் என்று கருதப்பட்டது. ஆனால் ஒரே இரவில், அதிபராவதற்கு தேவையான வாக்குகளை டிரம்ப் பெற்றுள்ளார் என்பது உறுதியானது. கடந்த 130 ஆண்டுகளில், ஒரு முன்னாள் அதிபர் மீண்டும் அதிபராக தேர்ந்தெடுக்கப்படுவது இதுவே முதல் முறையாகும், 78 வயதான ஒருவர் அதிபராக தேர்ந்தெடுக்கப்படுவதும் முதல் முறையாகும்.
இருப்பினும், அதிபர் தேர்தலுக்கான முடிவுகள் அதிகாரபூர்வமாக இன்னும் இறுதிசெய்யப்படவில்லை. முடிவை தீர்மானிக்கக் கூடிய முக்கிய மாகாணங்களில் மிக நெருக்கமான போட்டி இரு வேட்பாளர்களுக்கு இடையில் நிலவினால், முடிவுகள் நிச்சயமற்றதாக இருக்கும் என்ற அச்சம் இருந்தது. ஆனால், எதிர்ப்பார்த்ததை விட முன்னதாகவே வட காரோலினா, ஜார்ஜியா, பென்சில்வேனியா, விஸ்கான்சின் ஆகிய மாகாணங்களில் வெற்றி கிடைத்துவிட்டது. அத்துடன் குடியரசுக் கட்சியின் கோட்டையாக கருதப்படும் மாகாணங்களில் கிடைத்த வெற்றி, டிரம்ப் 270 இடங்கள் பெற்று அதிபராவதை சாத்தியமாக்கியது.
இருப்பினும், ஒவ்வொரு மாகாணத்திலும் விரிவான தேர்தல் முடிவுகளை அதிகாரபூர்வமாக அறிவிக்க மேலும் சில நாட்கள் அல்லது வாரங்கள் கூட ஆகலாம். 2025ம் ஆண்டு ஜனவரி 20ம் தேதி நடைபெறும் பதவியேற்பு விழாவில் டிரம்ப் அமெரிக்காவின் அதிபராக பொறுப்பேற்பார். அப்போது தான் அவர் அதிபருக்கான அதிகாரங்களையும் பொறுப்புகளையும் அதிகாரபூர்வமாக ஏற்றுக்கொள்வார்.
தகுதியான ஒவ்வொரு வாக்கும் இறுதி முடிவுகளில் இடம்பெற்ற பிறகு, தேர்வாளர் குழு தேர்தல் முடிவுகளை உறுதி செய்யும். ஒவ்வொரு மாகாணத்திலும் தேர்வாளர் குழுவின் வாக்குகள் வெவ்வேறு எண்ணிக்கையில் இருக்கும். வாக்காளர்களின் ஆதரவு மட்டுமல்லாமல் இந்த வாக்குக்களை பெறுவது தான் அதிபராக ஒருவர் தேர்ந்தெடுக்கப்படுவதற்கு வழிவகுக்கும்.
பொதுவாக, பெரும்பான்மையான வாக்குகளை (popular vote) யார் பெறுகிறார்களோ அவர்களுக்கே தேர்வாளர் குழுவின் வாக்குகளை மாகாணங்கள் வழங்கிவிடும். இது டிசம்பர் 17-ம் தேதி கூட்டங்களுக்கு பிறகு முடிவு செய்யப்படும். புதிதாக தேர்ந்தெடுக்கப்பட்ட அமெரிக்க காங்கிரஸ் ஜனவரி 6-ம் தேதி கூடி, தேர்வாளர் குழுவின் வாக்குகளை எண்ணி, புதிய அதிபர் யார் என்பதை உறுதி செய்யும். இதையடுத்து, ஜனவரி 20, 2025 அன்று அதிபராக தேர்ந்தெடுக்கப்பட்டவர் மற்றும் துணைத் தலைவராகத் தேர்ந்தெடுக்கப்பட்டவர் அமெரிக்க தலைநகரின் படிகளில் பதவிப் பிரமாணம் செய்து, முறையே அமெரிக்காவின் அதிபராகவும், துணைத் தலைவராகவும் பதவியேற்பார்கள்.
Readmore: வெள்ளிக்கிழமையில் இந்த காயத்ரி மந்திரத்தை சொல்லிப் பாருங்க..!! வறுமை நீங்கி செல்வம் பெருகும்..!!
