சிறு, குறு தொழில் நிறுவனங்களில் ஸ்மார்ட் மீட்டர் பொருத்தப்பட்டு ஜூன் மாதத்திற்கு பிறகு மின்கட்டணம் 25% கூடுதலாக வசூலிக்கப்படும் என தெரிவிக்கப்பட்டுள்ளது.
தமிழ்நாடு முழுவதும் உள்ள அனைத்து வீடுகள் மற்றும் தொழில் நிறுவனங்களுக்கு தடையில்லாமல் மின்சாரம் கிடைக்கும் நோக்கில், அரசு பல்வேறு நடவடிக்கைகளை எடுத்து வருகிறது. தமிழ்நாட்டில் பொதுவாக 6 மாதத்திற்கு ஒருமுறை மின்கட்டணம் உயர்த்தப்பட்டு வருகிறது. குறிப்பாக சிறு, குறு தொழில் நிறுவனங்களுக்கான மின் கட்டணத்தை அரசு மாற்றியமைத்து வருகிறது. தமிழ்நாட்டில் மட்டும் மொத்தம் 2 லட்சத்திற்கும் அதிகமான சிறுகுறு தொழில் நிறுவனங்கள் இயங்கி வருகின்றன.
எம்.எஸ்.எம்.இ என்று அழைக்கப்படும் இந்த சிறு குறு தொழில் நிறுவனங்களில் அதிகளவில் மின்சாரம் பயன்பாடு இருந்து வருவதாக மின்வாரியம் தெரிவித்துள்ளது . இதனால் இந்த நிறுவனங்களை ஜூன் மாதத்திற்கு பிறகு எலக்ட்ரானிக் மின் மீட்டரை ஸ்மார்ட் மின் மீட்டராக மாற்றுவதற்கு திட்டமிடப்பட்டுள்ளது. இவ்வாறு ஸ்மார்ட் மின்மீட்டர் பொருத்தப்பட்ட பிறகு மாலை 6 மணி முதல் இரவு 10 மணி வரை பயன்படுத்தப்படும் மின்சாரத்திற்கு மட்டும் கூடுதலாக 25% மின் கட்டணம் வசூலிக்கப்படும் என்று அறிவிப்பு வெளியிடப்பட்டுள்ளது.
