திமுகவினர் இந்தி கொள்கையில் மக்களை ஏமாற்றி வருவதாக கூறியுள்ள திருச்சி சிவாவின் மகனும், பாஜகவின் ஓபிசி பிரிவின் மாநில செயலாளருமான சூர்யா சிவா, இதற்கு ஆதாரமாக தனது தந்தையின் வீடியோ ஒன்றை ட்விட்டரில் பகிர்ந்துள்ளார்.
திமுக மூத்த தலைவர்களில் ஒருவரும் நாடாளுமன்ற உறுப்பினருமான திருச்சி சிவாவின் மகன் சூர்யா சிவா, கடந்த மே மாதம் திமுகவில் இருந்து விலகி பாஜகவில் இணைந்தார். பாஜக ஓபிசி அணியின் மாநில பொதுச்செயலாளராக திருச்சி சூர்யா சிவா நியமிக்கப்பட்டார். திமுகவில் 15 ஆண்டுகளாக உழைத்த தனக்கு கட்சியில் அங்கீகாரம் கிடைக்கவில்லை. திமுக சர்வாதிகாரத்துடன் செயல்படுகிறது என்று பல்வேறு குற்றச்சாட்டுகளை அவர் முன்வைத்திருந்தார். மேலும், திமுக குறித்து பல்வேறு விமர்சனங்களை அவர் முன்வைத்து வருகிறார்.
இந்நிலையில், தற்போது திமுக இந்தி திணிக்கப்படுவதாக கூறிவரும் சூழலில், தனது தந்தையின் வீடியோ ஒன்றை சூர்யா சிவா ட்விட்டரில் வெளியிட்டுள்ளார். அதில், திமுக தலைவர்களின் கொள்கை சான்று. மக்கள் இனி ஏமாற தயாராக இல்லை. உங்கள் மொழி அரசியல் இனி தமிழ்நாட்டில் எடுப்படாது” என அவர் குறிப்பிட்டுள்ளார். மேலும், வீடியோவில், தனக்கு இந்தி தெரியாது என்று திருச்சி சிவா கூறும் வீடியோவையும், இந்தியில் அவர் பாட்டு பாடுவது போன்ற வீடியோவை சூர்யா சிவா இணைத்து பதிவிட்டுள்ளார்.
