டெல்லியில் ஷ்ரத்தா வாக்கர் என்ற இளம்பெண் தனது காதலனால் துண்டு துண்டுகளாக வெட்டிப் படுகொலை செய்யப்பட்ட சம்பவம் பெரும் அதிர்வலைகளை ஏற்படுத்தியது. இந்நிலையில், இதேபோன்று மற்றொரு சம்பவம் பீகாரில் பட்டப்பகலில் அரங்கேறியுள்ளது.
பீகார் மாநிலம் பாகல்பூர் பகுதியைச் சேர்ந்தவர் அசோக் யாதவ். அவரது மனைவி நீலம்தேவி (40). இவர்கள் மளிகை கடை வைத்து நடத்தி வந்துள்ளனர். இந்நிலையில், அதே ஊரைச் சேர்ந்த ஷகில் அகமது என்பவரிடம் கடன் வாங்கியிருந்தனர். ஒரு மாதத்திற்கு முன்பு பணத்தை திருப்பி கொடுப்பது தொடர்பாக இருதரப்பினருக்கும் இடையே தகராறு ஏற்பட்டுள்ளது. இந்நிலையில், நீலம் தேவி தனது மகனுடன் அருகில் உள்ள சந்தையில் பொருட்கள் வாங்கச் சென்றுள்ளார். அப்போதும், கடன் கொடுத்த ஷகீல் தனது சகோதரர் முகமது ஜூதினுடன் அங்கு வந்து நீலத்திடம் தகராறு செய்துள்ளார்.
ஒரு கட்டத்தில் ஆத்திரமடைந்த ஷகிலும் அவரது சகோதரரும் கூட்டம் நிறைந்த சந்தையில் அனைவர் முன்னிலையிலும் அந்த பெண்ணை ஆயுதங்களால் தாக்கியுள்ளனர். மேலும், அந்த கொடூரன்கள் அந்த பெண்ணின் கை, காது மற்றும் மார்பகங்களை வெட்டிவிட்டு தப்பியோடிவிட்டனர். இதையடுத்து, அங்கிருந்தவர்கள் அந்த பெண்ணை மீட்டு மருத்துவமனையில் சேர்த்தனர். ஆனால், அவர் சிகிச்சை பலனின்றி உயிரிழந்தார். இச்சம்பவம் தொடர்பாக போலீசார் வழக்குப்பதிவு செய்து விசாரணை மேற்கொண்டு வருகின்றனர். அதுமட்டுமின்றி நீலம் இறப்பதற்கு முன்பு கொலையாளியின் பெயரை போலீசாரிடம் கூறியுள்ளார். அவரின் வாக்குமூலத்தின் அடிப்படையில் விசாரணை தீவிரப்படுத்தப்பட்டுள்ளது.
