கள்ளக்குறிச்சி மாணவி மரண வழக்கில் பள்ளி தாளாளர் உள்பட 5 பேரும் ஜாமீன் வழங்க கோரி சென்னை உயர்நீதிமன்றத்தில் முறையீடு செய்துள்ளனர்.
கள்ளக்குறிச்சி மாணவி ஸ்ரீமதி மரண வழக்கில் தனியார் பள்ளி தாளாளர் ரவிக்குமார், செயலாளர் சாந்தி, பள்ளி முதல்வர் சிவசங்கரன், வேதியியல் ஆசிரியை ஹரிப்பிரியா, கணித ஆசிரியை கிருத்திகா ஆகிய 5 பேரை போலீசார் கைது செய்தனர். இந்த வழக்கில் 5 பேரையும் சிபிசிஐடி போலீசார், ஒரு நாள் காவலில் எடுத்து விசாரணை நடத்தினர். சுமார் 9 மணி நேர விசாரணைக்கு பின்னர் நீதிபதி புஷ்பராணியின் உத்தரவின்பேரில் அவர்கள் 5 பேரும் சேலம் மத்திய சிறையில் அடைக்கப்பட்டனர். இதனைத் தொடர்ந்து 5 பேரும் ஜாமீன் கேட்டு தனித்தனியாக விழுப்புரம் மாவட்ட மகளிர் நீதிமன்றத்தில் கடந்த மாதம் 28ஆம் தேதி மனுதாக்கல் செய்தனர்.
இந்த ஜாமீன் மனுக்கள் ஏற்கனவே 3 முறை விசாரணைக்கு வந்தபோது, ஜாமீன் வழங்க நீதிமன்றம் மறுத்துவிட்ட நிலையில், 4-வது முறையாக இந்த மனுக்கள் மீண்டும் விசாரணைக்கு வந்தது. அப்போது வாதங்களை கேட்டறிந்த விழுப்புரம் நீதிமன்றம் பள்ளி தாளாளர் ரவிக்குமார் உள்பட 5 பேரின் ஜாமீன் மனுக்களையும் மீண்டும் தள்ளுபடி செய்து உத்தரவிட்டது. இந்நிலையில், சென்னை உயர்நீதிமன்றத்தில் ஜாமீன் கேட்டு 5 பேரும் முறையீடு செய்துள்ளனர். விழுப்புரம் மகளிர் நீதிமன்றம் தங்களுக்கு ஜாமீன் வழங்க மறுத்ததை அடுத்து, சென்னை ஐகோர்ட்டை நாடியுள்ளனர். தங்களுக்கு எதிரான குற்றச்சாட்டுகளுக்கு அடிப்படை ஆதாரமில்லை எனவும் மனுவில் குறிப்பிட்டுள்ளனர்.
