இந்த ஆண்டு தீபாவளி பண்டிகையை முன்னிட்டு வெளியான ஜிகர்தண்டா டபுள் எக்ஸ் திரைப்படம் மிகப்பெரிய வெற்றியை பெற்று இருக்கிறது. கார்த்திக் சுப்புராஜ் இயக்கத்தில் ராகவா லாரன்ஸ் மற்றும் எஸ் ஜே சூர்யா இந்த திரைப்படத்தில் நடித்திருந்தனர். இந்தத் திரைப்படம் வெளியான முதல் வாரத்தில் மட்டும் 45 கோடி வசூல் செய்திருக்கிறது.
இந்தத் திரைப்படத்தின் வெற்றியை தொடர்ந்து முக்கிய நகரங்களுக்கு சென்று படத்தின் வெற்றி கொண்டாட்டங்களில் படக்குழுவினர் கலந்து கொண்டு வருகின்றனர். இதன் ஒரு பகுதியாக கோயமுத்தூரில் நடைபெற்ற வெற்றி விழாவிலும் படக்குழுவினர் கலந்து கொண்டனர். அப்போது பேசிய எஸ்.ஜே.சூர்யா இந்தத் திரைப்படம் கார்த்திக் சுப்புராஜின் குறிஞ்சி மலர் போன்றது என தெரிவித்தார்.
அப்போது சூப்பர் ஸ்டார் இந்த திரைப்படத்தின் வெற்றி குறித்து பாராட்டியதையும் நினைவு கூர்ந்தார். இந்தத் திரைப்படம் தொடர்பாக பாராட்டு கடிதத்தை எழுதி இருந்த ரஜினிகாந்த் ஜிகர்தண்டா டபுள் எக்ஸ் திரைப்படம் மிகச் சிறப்பாக இருக்கிறது என்றும் இது கார்த்திக் சுப்புராஜின் குறிஞ்சி மலர் எனவும் தெரிவித்திருக்கிறார். இது போன்ற திரைப்படங்கள் மிகவும் அரிதாக வரும் என அவர் குறிப்பிட்டு இருந்தார். மேலும் இந்தத் திரைப்படத்தில் எஸ்.ஜே.சூர்யா வின் நடிப்பை பாராட்டிய அவர் நடிகவேள் எம்.ஆர்.ராதா போன்று சூர்யாவின் நடிப்பு இருக்கிறது என புகழ்ந்தார்.
இது குறித்து பேசிய எஸ்.ஜே.சூர்யா தன்னுடைய நடிப்பை நடிகை வேல் எம்.ஆர்.ராதா அவர்களுடன் ஒப்பிட்டு புகழ்ந்து பேசியது என்னுடைய வாழ்நாளில் கிடைத்த ஆகச்சிறந்த பாராட்டு என தெரிவித்தார். இந்தப் பிறவியில் கிடைத்த மிகச்சிறந்த பாராட்டாகவும் அது இருக்கும் என அவர் தெரிவித்துள்ளார். சூப்பர் ஸ்டாரின் கடிதம் பொதுமக்களிடம் மிகப் பெரிய அளவில் ரீச் ஆகியிருப்பது இந்தத் திரைப்படத்தின் வெற்றிக்கு மேலும் உதவும் எனவும் தெரிவித்துள்ளார்.
