கலை அறிவியல் கல்லூரிகளில் பி.காம் 2-ம் ஆண்டு சேர்க்கையை பின்பற்ற வேண்டும் என்று கல்லூரி கல்வி இயக்ககம் உத்தரவிட்டுள்ளது..
அனைத்து கல்லூரிக்கல்வி இணை இயக்குனர்களுக்கும் கல்லூரி கல்வி இயக்குனர் ஈஸ்வரமூர்த்தி சுற்றறிக்கை ஒன்றை அனுப்பி உள்ளார்.. அதில் “ 2021-ம் ஆண்டு உயர்கல்வித்துறை அரசாணையில் கூறப்பட்டுள்ள வழிகாட்டு நெறிமுறைகளின் படி 2022-23 முதல் கல்வியாண்டில் நேரடியாக பி.காம், 2-ம் ஆண்டில், வணிகவியல் பயிற்சி பட்டயப்படிப்பு (டிப்ளமோ) மற்றும் வணிகவியல் பயிற்சி கணினி பயன்பாடுகள் பட்டயப்படிப்பு (டிப்ளமோ) முடித்த மாணவர்களுக்கு கல்லூரிகளில் சேர்க்கை அளிக்க அரசு மற்றும் அரசு சுயநிதி கல்லூரி முதல்வர்களுக்கு உரிய அறிவுறுத்தல்கள் வழங்கப்பட்டது..
இதுகுறித்து 2022-23-ம் ஆண்டின் மாணவர் சேர்க்கை வழிகாட்டு நெறிமுறைகளிலும் தெரிவிக்கப்பட்டு இருந்தது.. ஆனால் சில கல்லூரிகளில் பி.காம். 2-ம் ஆண்டு சேர்க்கை செய்யப்படவில்லை என்று புகார் தெரிவிக்கப்பட்டுள்ளது..
எனவே உயர்கல்வித்துறை அரசாணையில் தெரிவித்த பி.காம் 2-ம் ஆண்டு நேரடி சேர்க்கையை பின்பற்ற வேண்டும் என்று தங்கள் கட்டுப்பாட்டின் கீழ் இயங்கும் அரசு, அரசு உதவிபெறும் மற்றும் சுயநிதி கல்லூரிகளின் முதல்வர்களுக்கு அறிவுறுத்துமாறு கேட்டுக்கொள்ளப்படுகிறது.. ” என்று தெரிவிக்கப்பட்டுள்ளது.
