டிஎன்பிஎஸ்சி தலைவர் உள்ளிட்ட 10 உறுப்பினர்கள் பதவிகளுக்கான பெயர்களை தமிழ்நாடு அரசு பரிந்துரைத்துள்ள நிலையில், அதற்கு ஒப்புதல் அளிக்காமல் ஆளுநர் நிறுத்தி வைத்துள்ளதாக தகவல் வெளியாகியுள்ளது.
அரசு துறைகளுக்கு தேவையான பணியாளர்களை நியமனம் செய்வதில் தமிழ்நாடு அரசுப் பணியாளர் தேர்வாணையம் முக்கிய பங்காற்றி வருகிறது. ஆனால், டிஎன்பிஎஸ்சிக்கு நிரந்தர தலைவர் மற்றும் போதிய உறுப்பினர்கள் இல்லை என்று கூறப்படுகிறது. இந்த அமைப்பில் தலைவர் மற்றும் 13 உறுப்பினர்கள் பணியாற்ற வேண்டும். ஆனால், பல மாதங்களாக சில உறுப்பினர் பணியிடங்கள் காலியாக உள்ளது.
தமிழ்நாடு அரசுப் பணியாளர் தேர்வாணையத்தின் (டிஎன்பிஎஸ்சி) தலைவர் பதவிக்கு சைலேந்திரபாபு மற்றும் 10 உறுப்பினர் பதவிகளுக்கு தமிழ்நாடு அரசு பரிந்துரை செய்து ஆளுநருக்கு அனுப்பியது. ஆனால், அரசின் பரிந்துரைக்கு ஒப்புதல் அளிக்காமல் ஒரு மாதமாக ஆளுநர் ஆர்.என்.ரவி நிறுத்தி வைத்துள்ளதாக செய்திகள் வெளியாகியுள்ளன. இதுதொடர்பாக சில கேள்விகளை ஆளுநர் எழுப்பியதாகவும், அதற்கு தமிழ்நாடு அரசு தரப்பில் விளக்கம் அளித்துள்ளதாகவும் கூறப்படுகிறது.
