இந்து பெண்களை அவமதிப்பவர்களின் கைகளை வெட்டுவோம் என மத்திய இணை அமைச்சர் அஸ்வினி குமார் சவுபே கூறிய கருத்து சர்ச்சையை ஏற்படுத்தியுள்ளது.
ராஷ்ட்ரிய ஜனதா தள கட்சியின் எம்எல்ஏவாக இருப்பவர் பாய் வீரேந்திரா. இவர், இந்து-இஸ்லாமியர் பிரிவினையை பயன்படுத்தி பாஜக போலி அரசியல் செய்வதாகவும், ஆனால் பாஜக தலைவர்கள் சிலர் தங்கள் மகள்களை, இஸ்லாமிய சமூகத்தினருக்கு திருமணம் செய்து வைத்துள்ளனர் என்றும் கூறினார்.
பாஜக மூத்த தலைவர்கள் அத்வானி, முரளி மனோகர் ஜோஷி உள்ளிட்டோர் இதற்கு உதாரணம் என்றும், தங்கள் மகள்களை இஸ்லாமியர்களுக்கு திருமணம் செய்து வைப்பதை விட்டுவிட்டு, அவர்களை பாஜக தலைவர்கள் பாதுகாப்பாக வைத்திருக்க வேண்டும் எனவும் தெரிவித்தார்.
இதற்கு கடும் கண்டனம் தெரிவித்துள்ள மத்திய இணையமைச்சர் அஸ்வினி குமார் சவுபே இந்து மதத்தை சேர்ந்த மகள்களை அவமதிப்பவர்களின் கைகளை வெட்டுவேன் என்று கூறியுள்ளார். அவரது இந்த கருத்து அரசியல் கட்சியினர் மத்தியில் பெரும் அதிர்ச்சியை ஏற்படுத்தியுள்ளது.
