பச்சை மைதானத்தில் பந்தாடிய தோனி, பசித்த வயிறுக்கு சோறுபோடும் முயற்சியில் களமிறங்கியுள்ளார்.
இந்திய கிரிக்கெட் அணியின் முன்னாள் கேப்டன் தோனி, மற்ற வீரர்களைப் போன்று பொதுவெளியில் அடிக்கடி தோன்றி மக்கள் பார்வையில் இருப்பவர் அல்ல. பொதுவாக சமூக வலைதளங்களில் இருந்து விலகியே இருப்பார். எப்போதாவதுதான் தனது தனிப்பட்ட வாழ்க்கை குறித்த புகைப்படங்கள், வீடியோக்களை பகிர்வார். இந்நிலையில், தோனி தனது இன்ஸ்டாகிராம் பக்கத்தில் ஒரு வீடியோவை ஷேர் செய்துள்ளார். ‘புதிதாக ஒன்றைக் கற்றுக்கொண்டதில் மகிழ்ச்சி. ஆனால் வேலையை முடிக்கத்தான் அதிக நேரம் எடுத்தது’ என பதிவிட்டுள்ளார். அந்த வீடியோவில், அவர் டிராக்டர் ஓட்டி தனது பண்ணையில் வயலை உழுவதை காணமுடிகிறது. விவசாயியாக மாறிய தோனியின் இந்த புதிய வீடியோ வைரலாகி வருகிறது.
ரசிகர்களின் கண்களுக்கு விருந்து படைத்த தோனி, பசித்த வயிற்றுக்கு விருந்து படைக்கும் விவசாயியாக அவதாரம் எடுத்துள்ளார். இரண்டு ஆண்டுகளுக்குப் பிறகு தோனி வீடியோ வெளியிட்டதை அவரது ரசிகர்கள் கொண்டாடி வருகின்றனர். கடைசியாக தோனி தனது இன்ஸ்டாகிராம் பக்கத்தில் 2021ஆம் ஆண்டு ஜனவரி 8ஆம் தேதி ஒரு வீடியோவை பதிவிட்டிருந்தார். அதில், தனது பண்ணையில் இருந்து ஸ்ட்ராபெர்ரி பழங்களை பறித்து சாப்பிடுவதை காணலாம்.