இந்தியா முழுவதும் நடத்தப்பட்ட ஆய்வில் 942 பறவை இனங்களின் நிலை பல்வேறு வகைகளில் சரிவை பிரதிபலிக்கிறது. இதில் 178 பறவை இனங்கள் அதிக பாதுகாப்பு அக்கறை கொண்ட வகையில் உள்ளன. ஸ்டேட் ஆஃப் இந்தியா பறவைகள் 2023ஆம் ஆண்டின் அறிக்கை வெளியாகியுள்ளது. இது இந்தியாவில் உள்ள பறவைகளின் எண்ணிக்கை, பாதுகாப்பு ஆகியவற்றில் கவனம் செலுத்தும் வகையில் உருவாக்கப்பட்டுள்ளது. ‘பாதுகாப்பு முன்னுரிமை’ என்ற அடிப்படையில் வைக்கப்பட வேண்டிய அழிந்து வரும் இனங்கள் பற்றியும் இந்த அறிக்கை குறிப்பிட்டுள்ளது.
இதுதொடர்பான ஆய்வு முடிவுகள் ஆன்லைன் தளமான இபேர்டு (eBird) இல் பதிவேற்றம் செய்யப்பட்டுள்ளது. இதன் மூலம் இந்தியாவில் உள்ள 942 பறவை இனங்களின் நிலையை மதிப்பிடுவதற்கு அந்தத் தரவு பெரும்பாலும் பயன்படுத்தப்பட்டது. மொத்தம் 30,000 பறவைக் கண்காணிப்பாளர்களின் 30 மில்லியன் கள அவதானிப்புகளின் அடிப்படையில் இந்த அறிக்கை தயார் செய்யப்பட்டுள்ளது.
இந்த அறிக்கையில், நீண்ட கால அடிப்படையில் மதிப்பிடப்பட்ட 348 பறவை இனங்களில், 60 சதவீதம் நீண்ட கால சரிவைக் காட்டுகின்றன. மதிப்பிடப்பட்ட 359 பறவை இனங்களில், 40% பறவை இனங்கள் குறைந்து வருவது தெரியவந்துள்ளது. கடந்த 30 ஆண்டுகளில் 204 இனங்கள் குறைந்து வருவதாகவும் அந்த அறிக்கையில் கூறப்பட்டுள்ளது. இதில், 178 இனங்கள் அதிக ‘பாதுகாப்பு முன்னுரிமை’ அடிப்படையில் வகைப்படுத்தப்பட்டுள்ளன.
இந்தியாவின் பறவைகள் தொடர்பாக 2020ஆம் ஆண்டு அறிக்கையுடன் ஒப்பிடுகையில், தற்போது அதிக முன்னேற்றம் இல்லை. 2020ஆம் ஆண்டு அதிக பாதுகாப்பு அக்கறை என வகைப்படுத்தப்பட்ட 101 பறவைகளில், இந்தாண்டு 74 பறவைகள் அதே பிரிவில் இருக்கின்றன. கூடுதலாக 2023ஆம் ஆண்டில் 104 இனங்கள் அதிக முன்னுரிமை பட்டியலில் இடம் பெற்றுள்ளன.
