பி.எட் படிப்புகளுக்கு இன்று முதல் அக்டோபர் 3-ம் தேதி வரை இணையதளத்தில் ஆன்லைன் மூலம் விண்ணப்பிக்கலாம்.
இது தொடர்பாக உயர் கல்வித்துறை வெளியிட்ட அறிவிப்பில்; பி.எட் படிப்புகளுக்கு இன்று முதல் அக்டோபர் 3-ம் தேதி வரை https://www.tngasaedu.in/ என்ற இணையதளத்தில் ஆன்லைன் மூலம் விண்ணப்பிக்கலாம். அக்டோபர் 6-ம் தேதி தரவரிசைப் பட்டியல் வெளியிடப்பட்டு, அக்டோபர் 12-ம் தேதி முதல் கலந்தாய்வு துவங்கும். அனைத்து வகை கல்லூரிகளிலும் பி.எட் மாணவர் சேர்க்கையில் 69% இட ஒதுக்கீடு முறை பின்பற்றப்பட உள்ளது. இணையதளம் மூலம் மாணவர் சேர்க்கை நடத்தப்பட வேண்டும்.
பி.எட் படிப்பில் சேர விரும்பும் பட்டியலினத்தவர்கள் 40 %, மிகவும் பிற்படுத்தப்பட்ட பிரிவினர் 43 %, பிற்படுத்தப்பட்டோர் 45 %, பொதுப்பிரிவினர் 50% மதிப்பெண்களை இளங்கலை படிப்புகளில் பெற்றிருக்க வேண்டும். இணையான படிப்புகள் என்று அரசால் அங்கீகரிக்கப்பட்ட படிப்புகளில் இளங்கலை அல்லது முதுகலை முடித்திருந்தாலும், தொடர்புடைய படிப்புகளில் பி.எட் சேரலாம்.
அரசு கல்வியியல் கல்லூரிகள், உதவி பெறும் கல்வியியல் கல்லூரிகளில் சேர www.tngasaedu.in இணையதளத்தின் மூலம் விண்ணப்பிக்க வேண்டும். தனியார் கல்லூரிகளில் சேர அந்தந்த கல்லூரிகளின் இணையதளத்தை அணுக வேண்டும். சான்றிதழ் சரிபார்ப்பின் போது அசல் சான்றிதழ்களை வைத்திருத்தல் அவசியம் என தெரிவிக்கப்பட்டுள்ளது.
