தெற்கு மும்பையில் உள்ள ஜிம்கானாவுக்கு அருகில் அமைந்துள்ள மாநில அரசால் நடத்தப்படும் சாவித்ரிபாய் புலே மகளிர் விடுதியில் அகோலாவை சேர்ந்த 18 வயது இளம்பெண் தங்கி உள்ளூர் கல்லூரி ஒன்றில் படித்து வந்துள்ளார். தனது குடும்ப சூழ்நிலைக்காக மாலை நேரங்களில் இவர் பகுதி நேர வேலை பார்த்து வந்ததாகவும் கூறப்படுகிறது. நீண்ட நாட்களாக விடுதியில் தங்கி இருக்கும் இவர், நான்காவது மாடியில் தனியாக வசித்து வந்துள்ளார்.
இந்நிலையில், இந்த பெண் காணாமல் போனதாக காவல் நிலையத்திற்கு தகவல் தெரிவிக்கப்பட்டது. இதையடுத்து, புகாரின் அடிப்படையில் நான்காவது மாடியில் உள்ள அவரது விடுதியின் சோதனை நடத்தப்பட்டது. அப்போது, அறை வெளியில் இருந்து பூட்டப்பட்டிருந்த நிலையில், அறைக்குள் நிர்வாண சடலமாக காணப்பட்டார். இதையடுத்து, பூட்டை உடைத்து கழுத்தியில் துப்பட்டா சுற்றப்பட்ட நிலையில் இளம்பெண் மீட்கப்பட்டார்.
விசாரணையில், அந்த விடுதியின் காவலாளியான பிரகாஷ் கனோஜியா திங்கட்கிழமை இரவு முதல் காணாமல் போனது காவல்துறைக்கு சந்தேகத்தை கிளப்பியது. மேலும், ஹாஸ்டல் சிசிடிவி கேமராவில் கனோஜியா நேற்று அதிகாலை 5.55 மணிக்கு மெயின் கேட் செக்யூரிட்டி கேபின் அருகே துணி மூட்டையை வைத்துவிட்டு வெளியே செல்வது பதிவாகியுள்ளது. ஹாஸ்டல் தண்ணீர் வசதிக்கான பொறுப்பாளராக அந்த பெண் இருந்ததால் மொட்டை மாடியின் சாவி அவரிடம் இருந்துள்ளது. அப்போது, செவ்வாய்க்கிழமை மாலை ஹாஸ்டல் அதிகாரிகள் அந்த பெண்ணின் அறையை தட்டியுள்ளளர். நீண்ட நேரமாக தட்டி கதவை திறக்காததால், ஜன்னல் வழியாக அறைக்குள் சென்று பார்த்தபோது, 2 படுக்கைகளுக்கு நடுவே தரையில் அந்த பெண் நிர்வாணமாக கிடந்துள்ளார்.
குடும்பத்திற்கு ஒரே பெண்ணான இவர் கல்லூரியில் இரண்டாம் ஆண்டு படித்து வந்தார். இவர் கடந்த திங்கள்கிழமை இரவு 11.30 மணியளவில் விடுதி தோழி ஒருவரிடம் கடைசியாக பேசிவிட்டு தனது அறைக்கு சென்றுள்ளார். அப்போது, அந்த பெண்ணின் அறைக்குள் புகுந்த கனோஜியா திங்கள்கிழமை இரவு 11.30 மணி முதல் செவ்வாய்கிழமை அதிகாலை 4 மணி வரை அந்த பெண்ணை பாலியல் வன்கொடுமை செய்துவிட்டு, எங்கே போலீஸில் மாட்டிவிடுவோம் என்ற பயத்தில் பெண்ணின் கழுத்தை நெரித்து கொலை செய்துள்ளார்.
தொடர்ந்து, கனோஜியா சிக்கிவிடுவோம் என்ற பயத்தில் அதிகாலை 5 மணியளவில் அருகில் உள்ள ரயில் தண்டவாளத்தில் ரயில் முன் பாய்ந்து தற்கொலை செய்து கொண்டதாக போலீசார் தெரிவிக்கின்றன. இதுகுறித்து காவல்துறை அதிகாரி ஒருவர் தெரிவிக்கையில், “இந்த வழக்கு தொடர்பாக நாங்கள் பாலியல் வன்கொடுமை மற்றும் கொலை வழக்கு பிரிவின் கீழ் பதிவு செய்துள்ளோம். பிரேத பரிசோதனை அறிக்கை வந்த பிறகே, அந்த பெண் பாலியல் வன்கொடுமை செய்யப்பட்டாரா என்பதை உறுதி செய்ய முடியும்” என தெரிவித்தார்.
